Асан Джалилов
Президент Қасым-Жомарт Тоқаевтың төрағалығымен өткен Қауіпсіздік Кеңесінің отырысында Қазақстанның ғарыш саласын дамыту мәселелері қаралды. Жиында саланың қазіргі ахуалы, жүзеге асырылып жатқан жобалар және алдағы даму бағыттары талқыланды.
Спутниктік байланыс пен ғарыш инфрақұрылымына басымдық беріледі
Қазақстанда ғарыш саласы жаңғыртылады. Осы мақсатта Қауіпсіздік Кеңесінің отырысында спутниктік байланыс жүйелерінің тұрақты жұмысын қамтамасыз ету, ғарыш инфрақұрылымын дамыту және жаңа технологияларды енгізу мәселелеріне ерекше назар аударылды.
Премьер-министрдің орынбасары – Жасанды интеллект және цифрлық даму министрі Жаслан Мәдиев Мемлекет басшысына спутниктік жүйелерді дамыту, ғарыш инфрақұрылымын жетілдіру және ғарыш деректеріне негізделген цифрлық шешімдерді енгізу бағытындағы жұмыстар туралы баяндады.
Оның айтуынша, ғарыштық технологиялар бүгінде экономика, мемлекеттік басқару, ауыл шаруашылығы, экология және төтенше жағдайлардың алдын алу салаларында кеңінен қолданылып келеді.
«Бәйтерек» жобасының маңызы атап өтілді
Отырыс барысында ғарыш ғылымын дамыту мәселесі де қаралды. Президент ғылыми зерттеулерге, оның ішінде астрофизика саласына қолдау көрсетудің маңызын атап өтті.
Сонымен қатар ұлттық технологиялық және инженерлік әлеуетті күшейтуге бағытталған «Бәйтерек» жобасының жүзеге асырылу барысы оң бағаланды. Сарапшылардың пікірінше, бұл жоба Қазақстанның ғарыш саласындағы мүмкіндіктерін кеңейтіп, жоғары технологиялық өндірістердің дамуына ықпал етеді.
Мемлекет басшысы қазіргі таңда ғарыш индустриясының түбегейлі өзгергенін атап өтті. Бұрын бұл сала тек ірі мемлекеттердің бақылауында болса, бүгінде байланыс, навигация, интернет, мониторинг және ғылыми зерттеулер бағытында жеке компаниялардың рөлі артып келеді.
Халықаралық ынтымақтастық кеңейеді
Қауіпсіздік Кеңесінде халықаралық әріптестік мәселесіне де назар аударылды. Президент Ресей Федерациясымен және басқа да шетелдік серіктестермен стратегиялық ынтымақтастықты одан әрі дамыту қажеттігін айтты.
Сондай-ақ Байқоңыр қаласы мен оған жақын орналасқан елді мекендердің әлеуметтік-тұрмыстық жағдайын жақсарту мәселесі көтерілді. Бұл бағыттағы жұмыстарды жалғастырудың маңызы ерекше екені атап өтілді.
Мемлекет басшысы ғарыш саласының ұлттық қауіпсіздік, цифрлық даму және технологиялық тәуелсіздік үшін стратегиялық маңызға ие екенін айтып, Үкіметке саланы жаңғыртуға және оның әлеуетін мемлекет мүддесіне тиімді пайдалануға бағытталған бірқатар нақты тапсырма берді.
