Асан Джалилов
Қазақстанда жаңа Үкімет құрамы жасақталды. Президент Қасым-Жомарт Тоқаевтың Жарлығымен Олжас Бектенов Премьер-министр қызметіне қайта тағайындалып, Министрлер кабинетінің құрамы бекітілді. Бірқатар мемлекеттік органның басшылары қызметін жалғастырса, бірнеше ведомствоға жаңа министрлер келді.
Жаңа Үкіметті қалыптастыру Құрылтайдың жалпы отырысынан басталды. Мемлекет басшысы Премьер-министр лауазымына Олжас Бектеновтің кандидатурасын ұсынды. Құрылтайдың келісімінен кейін Президент оны Үкімет басшысы қызметіне қайта тағайындау туралы Жарлыққа қол қойды.
Олжас Бектенов Үкіметті 2024 жылғы ақпаннан бері басқарып келеді. Бұған дейін ол Президент Әкімшілігінің басшысы, Сыбайлас жемқорлыққа қарсы іс-қимыл агенттігінің төрағасы және осы ведомство төрағасының бірінші орынбасары қызметтерін атқарған.
Үкімет басшылығының құрамы
Жаңадан жасақталған Үкіметте Нұрлыбек Нәлібаев Премьер-министрдің бірінші орынбасары қызметін атқарады. Ғалымжан Қойшыбаев Премьер-министрдің орынбасары – Үкімет Аппаратының басшысы, Қанат Бозымбаев Премьер-министрдің орынбасары болып бекітілді.
Сонымен қатар Серік Жұманғарин Премьер-министрдің орынбасары – Ұлттық экономика министрі, ал Жаслан Мәдиев Премьер-министрдің орынбасары – Жасанды интеллект және цифрлық даму министрі қызметін атқарады.
Министрлер кабинетінің толық құрамы
Жаңа Үкімет құрамында Ержан Сәденов Ішкі істер министрі, Дәурен Қосанов Қорғаныс министрі, Мұхтар Тілеуберді Сыртқы істер министрі болып қызмет атқарады.
Экономика мен өндіріс саласындағы ведомстволарды Мәди Такиев – Қаржы министрі, Арман Шаққалиев – Сауда және интеграция министрі, Ерсайын Нағаспаев – Өнеркәсіп және құрылыс министрі, Ерлан Ақкенженов – Энергетика министрі, Нұрлан Сауранбаев – Көлік министрі басқарады.
Ауыл шаруашылығы министрі қызметін Айдарбек Сапаров, Су ресурстары және ирригация министрі қызметін Нұржан Нұржігітов, ал Экология және табиғи ресурстар министрі қызметін Әлібек Қуантыров атқарады.
Әлеуметтік салада Ақмарал Әлназарова Денсаулық сақтау министрі, Асқарбек Ертаев Еңбек және халықты әлеуметтік қорғау министрі, Жұлдыз Сүлейменова Оқу-ағарту министрі, Саясат Нұрбек Ғылым және жоғары білім министрі қызметіне тағайындалды.
Арман Қырықбаев Мәдениет және ақпарат министрі, Ербол Мырзабосынов Туризм және спорт министрі, Ерлан Сәрсембаев Әділет министрі, ал Мұрат Мұханов Төтенше жағдайлар министрі қызметін атқарады.
Үкіметте қандай кадрлық өзгерістер болды
Жаңа Үкіметті жасақтау кезінде министрлердің едәуір бөлігі өз қызметін жалғастырды. Сонымен қатар бірнеше ведомствоның басшылығы жаңарды. Экология және табиғи ресурстар министрлігіне Әлібек Қуантыров, Төтенше жағдайлар министрлігіне Мұрат Мұханов, Мәдениет және ақпарат министрлігіне Арман Қырықбаев келді.
Жаңа Министрлер кабинетінің құрылуы мемлекеттік басқару жүйесіндегі өзгерістермен қатар жүріп отыр. Бұған дейін Президент Құрылтайда Вице-президент лауазымына Ерлан Қариннің кандидатурасын ұсынған еді. Құрылтайдың келісімінен кейін Мемлекет басшысының Жарлығымен Ерлан Қарин Қазақстан Республикасының Вице-президенті болып тағайындалды.
