Rojnameya Kurdên Kazakîstanê Jiyana Kurd Dibe Dijital

Rojnameya Jîyana Kurd, 34 Salî: Ji Çapa Kaxezî Ber Bi Dîjîtal ve, Pêşengiya Medya Kurdî Li Kazakîstanê Dike

Almaty — Kazakistan: Rojnameya «Jîyana Kurd», organa çapemeniyê ya Komela Kurdên Kazakîstanê «Berbang», îsal salvegera xwe ya 34’an pîroz dike. Bi dîrokeke dirêj a têkoşîn û berdewamiyê, rojnama ku di sala 1991’ê de dest bi weşanê kiribû, niha bi biryareke dîrokî ber bi qonaxeke nû ve diçe: wê êdî wekî rojnameyeke elektronîkî li ser malpera fermî bê weşandin. Destpêka Rojnameya «Jîyana Kurd» vedigere sala 1991’ê, dema ku Serokê Komela Kurdên Yekîtiya Sovyetê «Yekbûn», Mehmed Babayêv, destûr stendibû ku li Komareke Sovyetê rojnameyeke Kurdî biweşîne. Di destpêkê de bi navê «Kurdistan» li bajarê Almatî yê Kazakîstanê û kovara «Kurdên YKSS» dest bi weşanê kirin. Navê kovarê paşê di sala 1992’an de bû «Kurd» û di sala 2004’an de jî bû «Nûbar». Di dirêjahiya van 34 salan de, gelek sernivîskar û xebatkarên navdar di rêdaksiyona rojnameyê de cih girtine. Sernivîskarê yekem Rostem Broyî bû, paşê Kinyazê Îbrahîm Mîrzoyêv, Mihemedê Silêman Yûsûbov, Mihemedê Misto Mamêdov, û Hesenê Hecî Silêman sernivîskariya wê kirine. Di navbera salên 2002-2004’an de navê rojnameyê bû «Kurdê Zana» û ji sala 2004’an ve jî wekî «Jîyana Kurd» berdewam kir. Hesenê Hecî Silêman (2004-2015), Hesenê Evdo Alîyêv (2015-2020), û Casimê Cefer Osmanov (2020-2022) di nav sernivîskarên wê yên dawî de ne.

Sernivîskarê Nû: Hesenê Mihemed Celîlov û Paşeroja Dîjîtal

Di 9’ê Îlona sala 2025’an de, Hesenê Mihemed Celîlov wekî sernivîskarê nû yê Rojnameya «Jîyana Kurd» hate destnîşankirin. Celîlov, di daxuyaniya xwe de kêfxweşiya xwe ya ji bo vê peywirê anî ziman û spasiyên xwe pêşkêşî hemû xebatkar û serokatiya Komela «Berbang» kir.

Celîlov, ragihand ku ji ber pirsgirêkên aborî rojnameyê her tim nikarîbû bi rêkûpêk li ser kaxezê bê weşandin. Lê niha, bi biryara nû ya veguhestina bo weşana elektronîkî, demek nû di dîroka «Jîyana Kurd» de dest pê dike. Ev pêngav dê rê bide rojnameyê ku bi awayekî domdar û berfirehtir bigihîje xwendevanên xwe, ne tenê rewşa Kurdên Kazakîstanê, lê herwiha mijarên aborî, siyasî, çandî, hunerî û werzişî yên Kazakîstan û cîhanê jî bîne ziman. Hesenê Mehmed Celîlov, bi geşbînî diyar kir ku ew hêvîdar in bi hevkarî û xebata giştî, dê ji bo pêşveçûna rojnameyê kar bikin. Ev guhertin, mîraseke girîng a medyayî ya Kurdan li Kazakîstanê bi serdema dîjîtal re adapte dike û ji bo nifşên nû derfetan diafirîne.

Çavkanî: www.pressin.info