Асан Джалилов
Қазақстанда балаларды интернеттегі зиянды әрі заңға қайшы контенттен қорғауға бағытталған жаңа тетіктер әзірленіп жатыр. Үкімет деңгейінде талқыланып жатқан бастамалардың бірі — балаларға арналған арнайы SIM-карталарды енгізу. Бұл туралы Оқу-ағарту министрі Жұлдыз Сүлейменова Үкімет отырысынан кейін өткен баспасөз мәслихатында мәлімдеді.
Министрдің айтуынша, қазіргі таңда балалардың цифрлық қауіпсіздігін қамтамасыз етуге арналған бірнеше ұсыныс қарастырылып жатыр. Осы мақсатта арнайы жұмыс тобы құрылып, мәселе қоғаммен ашық форматта талқылануда. Талқылауға ата-аналар, педагогикалық қауымдастық, сарапшылар және бұқаралық ақпарат құралдары тартылмақ.
Балаларды қорғау шаралары үш негізгі бағыт бойынша іске асырылуы жоспарланып отыр. Бірінші бағыт — балаларға арналған SIM-карталарды міндетті түрде тіркеу. Бұл балалардың интернетке қолжетімділігін бақылауға және олардың цифрлық кеңістіктегі қауіпсіздігін арттыруға мүмкіндік береді.
Екінші бағыт — 14 жасқа дейінгі балалардың заңға қайшы әрі зиянды контентті көруіне шектеу қою. Мұндай тетік балалардың әлеуметтік желілер мен өзге де онлайн платформаларда қауіпсіз ортада болуын қамтамасыз етуге бағытталған.
Үшінші бағыт білім беру саласына қатысты. Қазіргі таңда мектеп бағдарламасында цифрландыру және медиа сауаттылық пәндері оқытылады. Осы пәндер аясында балаларға интернетті саналы әрі жауапты пайдалану, ақпаратты талдау және цифрлық ортадағы қауіп-қатерді ажырата білу дағдыларын қалыптастыру көзделіп отыр.
Министрлік өкілдерінің айтуынша, бұл бастамалар шектеу қоюдан бұрын балалардың қауіпсіздігін қамтамасыз етуге, сондай-ақ ата-аналар мен қоғамның жауапкершілігін күшейтуге бағытталған. Жаңа шаралар кезең-кезеңімен енгізіліп, қоғамдық пікір мен ұсыныстар ескеріле отырып жүзеге асырылады.
