Асан Джалилов
Астана, 31 қазан 2025 жыл. Barbang Info — Қазақстан Президенті Қасым-Жомарт Тоқаев Татарстан Республикасының Раисы Рустам Миннихановпен кездесу өткізді. Мемлекет басшысы Рустам Миннихановты Татарстан басшысы қызметіне қайта сайлануымен құттықтап, Қазақстан мен Ресей арасындағы стратегиялық әріптестікті, сондай-ақ Татарстанның қазақстандық өңірлермен байланысын нығайтуға қосқан үлесі үшін алғыс білдірді.
12 қараша күні Мәскеуге мемлекеттік сапармен барамыз. Бұл екі ел қарым-қатынастары үшін маңызды кезең. Ынтымақтастықты жаңа деңгейге көтеретін құжаттарға қол қойылады. Қазақстан аумағында өндіріс ашу жоспарыңызды құптаймыз, – деді Қасым-Жомарт Тоқаев. Президент машина жасау, мұнай-газ химиясы және осы салаларға қажетті компоненттер өндірудегі табысты әріптестікті атап өтіп, «КамАЗ» және «Татнефть» компанияларымен жүзеге асырылып жатқан инвестициялық жобаларға ерекше назар аударылатынын айтты. Өз кезегінде Рустам Минниханов Қазақстанға шақырғаны үшін алғыс айтып, бизнес, өнеркәсіп, білім беру және мәдениет салаларындағы ынтымақтастықты одан әрі дамытуға дайын екенін жеткізді.
