Асан Джалилов
Қазақстанның жоғары білім жүйесіне дзюдо бағдарламасы кезең-кезеңімен енгізіледі. Осы мақсатта ҚР Ғылым және жоғары білім министрлігі мен Халықаралық дзюдо федерациясы (IJF) арасында ынтымақтастық туралы меморандумға қол қойылды.
Құжатқа Ғылым және жоғары білім министрі Саясат Нұрбек пен IJF президенті Мариус Визер қол қойды.
Студенттер арасында дзюдо дамытылады
Меморандум студенттер арасында дзюдоны кеңінен насихаттауға және бұқаралық спортты дамытуға бағытталған.
Ынтымақтастық аясында дзюдо бағдарламаларын жоғары оқу орындары мен колледждердің білім беру жүйесіне енгізу жоспарланып отыр. Сонымен қатар студенттік лигалар құру, жарыстар өткізу және спорттық инфрақұрылымды дамыту көзделген.
Жоба аясында дене шынықтыру және спорт саласындағы мамандардың біліктілігін арттыруға да ерекше көңіл бөлінеді.
Оқу орындары жаңа спорттық жабдықтармен қамтылады
Бағдарлама шеңберінде білім беру ұйымдарының материалдық-техникалық базасын күшейту жоспарланған.
Атап айтқанда, оқу орындары татамимен, арнайы спорттық жабдықтармен және дзюдоға арналған экипировкалармен қамтамасыз етіледі.
Жобаның операторы ретінде Jenys International Sports Foundation қоры белгіленді. Қор бағдарламаны қаржыландырып, оны іске асыру жұмыстарын үйлестіреді.
Тараптардың пікірінше, бұл бастама жастар арасында салауатты өмір салтын насихаттап, студенттік спорттың дамуына жаңа мүмкіндік береді.
