Қырғызстан тарихында алғаш рет парламент өзін-өзі таратуы мүмкін

Депутат Улан Примовтың айтуынша, сайлауды 2026 жылдың орнына 2025 жылы өткізу саяси тәуекелдердің алдын алып, билік тармақтарының тұрақты жұмысын қамтамасыз етеді. Бастаманы қолдаған 32 депутаттың қолы жиналған.

Оның айтуынша, парламенттің өзін-өзі таратуы ел тарихындағы алғашқы жағдай болмақ.
«Парламенттік және президенттік сайлауларды қатар өткізу жүйеге артық салмақ түсіріп, қателіктер мен заңбұзушылықтарға әкелуі мүмкін», – деді депутат.

Талқылаудан кейін комитет мүшелері ұсынысты қолдап, құжатты үйлестіру кеңесіне жолдады. Енді соңғы шешім қабылданатын отырыстың күні сол жерде анықталады.