Ferrari алғашқы электркөлігін таныстырды: жаңа Luce моделін Apple-дің бұрынғы дизайнері әзірледі

Ferrari компаниясы Luce деп аталатын алғашқы электркөлігін ресми түрде таныстырды. Жаңа модельдің дизайнын iPhone және Apple өнімдерінің бұрынғы бас дизайнері Джони Айв жетекшілік ететін LoveFrom студиясы әзірлеген.

Жаңа Ferrari қандай болады

Ferrari-дің алғашқы электрлі көлігі төрт электрқозғалтқышпен жабдықталған. Әр дөңгелекке жеке қозғалтқыш орнатылғандықтан, көліктің қуаты 1050 ат күшіне жетеді.

Компания мәліметінше, Luce моделі:
— 2,5 секундта сағатына 100 шақырым жылдамдыққа дейін үдейді;
— ең жоғары жылдамдығы 310 км/сағ болады;
— толық қуатталған кезде 530 шақырымға дейін жүре алады.

Төрт есікті хэтчбек бес адамға арналған.

Дизайн мен экологиялық технологиялар үйлестірілді

Ferrari өкілдерінің айтуынша, жаңа модельде экологиялық технологияларға ерекше көңіл бөлінген. Компания өндіріс барысында қайта өңделген алюминийді пайдалану арқылы көмірқышқыл газының шығарындыларын 70%-ға азайтқанын мәлімдеді.

Көліктің интерьері ретро және заманауи стильді біріктіреді. Салонда дәстүрлі батырмалар мен циферблаттар сенсорлық панельдермен үйлестірілген.

Жаңа модель кімдерге арналған

Ferrari-дің маркетинг және коммерция жөніндегі директоры Энрико Галлиераның айтуынша, Luce моделі ең алдымен гаражында электромобилі бар тұтынушыларға арналып отыр.

Компания жаңа электрокөлік арқылы премиум сегменттегі технологиялық бағытты күшейтуді көздейді.

Электрлі Ferrari қанша тұрады

Жаңа Luce моделінің бастапқы бағасы 550 мың еуро болады. Сарапшылар Ferrari-дің электрлі көлік нарығына шығуын әлемдік автоөнеркәсіптегі маңызды өзгерістердің бірі деп бағалап отыр.