Beatles тобына арналған мұражай

Лондонда The Beatles тобына арналған 7 қабатты мұражай ашылады. Жаңа интерактивті орталық әйгілі Savile Row көшесіндегі тарихи ғимаратта орналасады.

Лондонда The Beatles мұражайының ашылуы топ жанкүйерлері арасында үлкен қызығушылық тудырып отыр. Дәл осы ғимаратта музыканттар 1969 жылы Let It Be альбомын жазып, соңғы рет көпшілік алдында өнер көрсеткен.

Мұражайда не болады

Жоба аясында жеті қабатты кеңістік құрылып, онда интерактивті экспонаттар, сирек мұрағат материалдары және студиялық аймақтар орналастырылады.

Мұражайдың басты ерекшелігінің бірі – келушілердің The Beatles тобы соңғы концертін өткізген әйгілі шатырға шығу мүмкіндігі. Жобаны топ негізін қалаған Apple Corps Ltd. компаниясы жүзеге асырып жатыр.

Пол Маккартни мен Ринго Старр не деді

Пол Маккартни Savile Row ғимаратына қайта барғанын айтып, дайындалып жатқан жобаға жоғары баға берді. Музыканттың айтуынша, бұл орын топ тарихындағы ерекше естеліктермен байланысты. Ал Ринго Старр жаңа орталықты «үйге оралу» деп сипаттаған.

Ашылу мерзімі қашан

Қазіргі уақытта мұражайдың нақты ашылу күні жарияланған жоқ. Алайда жоба 2027 жылы іске қосылады деп жоспарланып отыр. Соңғы жылдары The Beatles тобына деген қызығушылық қайта күшейе түсті. Бұған музыканттар туралы түсіріліп жатқан жаңа фильмдер мен Питер Джексонның The Beatles: Get Back деректі сериясы әсер еткен.

Сарапшылардың пікірінше, жаңа мұражай Лондондағы маңызды туристік және музыкалық нысандардың біріне айналуы мүмкін.