Асан Джалилов
Қазақстанда әлеуметтік осал топтарға 1,7 млн теңгеге дейін грант беріледі. Мемлекет жаңа бизнес-бастамаларды қолдау және халықты жұмыспен қамтуды арттыру бағытындағы бағдарламаларды жалғастырып жатыр.
2026 жылғы 1 мамырдағы мәлімет бойынша, елде жұмыспен қамту шараларымен 101,3 мың адам қамтылып, 140,8 мың қазақстандық жұмысқа орналастырылған.
Қанша грант бөлінеді
Қазақстанда әлеуметтік осал топтарға 1,7 млн теңгеге дейін грант беру аясында биыл 9 мың мемлекеттік грант бөлу жоспарланып отыр.
Грант көлемі 400 АЕК-ке дейін, яғни шамамен 1 730 000 теңгені құрайды. Қаражат жаңа бизнес ашуға және кәсіпкерлік бастамаларды іске асыруға бағытталады.
Қандай бағдарламалар іске асып жатыр
Қазіргі таңда елде субсидияланатын жұмыс орындары бағдарламасы жалғасуда. Бүгінде бұл бағытпен 50,6 мың адам жұмысқа жолданған.
Оның ішінде:
— 37,6 мың адам қоғамдық жұмыстарға;
— 5,4 мың адам әлеуметтік жұмыс орындарына;
— 2,7 мың жас маман жастар практикасына;
— 4,9 мың адам «Күміс жас» жобасына қатысқан.
Онлайн оқу мен кәсіптік даярлық
Еңбек нарығында сұранысқа ие мамандықтарға оқыту жұмыстары да жалғасып жатыр. Онлайн оқумен 31,7 мың жұмыссыз азамат қамтылып, олардың 25,1 мыңы оқуын аяқтап, сертификат алған.
Сонымен қатар «Бастау Бизнес» жобасы арқылы кәсіпкерлік негіздеріне 16,9 мың адам оқытылған. Оның ішінде 7,3 мың адам оқуын толық аяқтаған.
Жұмысқа орналастыру қалай жүргізіліп жатыр
2026 жылдың басынан бері азаматтарды жұмысқа орналастыру бірнеше бағыт бойынша іске асырылған.
Атап айтқанда:
— 48,3 мың адам Электрондық еңбек биржасы арқылы жұмыс тапқан;
— 40 мың адам «10 мың тұрғынға 100 жұмыс орны» бастамасы аясында еңбекке тартылған;
— 1,9 мың адам мемлекеттік жобалар арқылы жұмысқа орналасқан.
Мамандардың айтуынша, бұл шаралар халық табысын арттыруға, кәсіпкерлікті дамытуға және еңбек нарығындағы тұрақтылықты күшейтуге бағытталған.
