Асан Джалилов
Қазақстанда ерікті түрде қоныс аударуды жоспарлап жүрген азаматтарға арналған жаңа цифрлық сервис қолжетімді болды. migration.enbek.kz порталындағы интерактивті карта арқылы қоныстануға ұсынылатын өңірлерді салыстыруға, бос жұмыс орындарын қарауға, сұранысқа ие мамандықтарды анықтауға және мемлекеттік қолдау шаралары туралы ақпарат алуға болады.
Жаңа сервистің негізгі мақсаты – азаматқа басқа өңірге көшпей тұрып, болашақ тұрғылықты жері мен еңбек нарығындағы мүмкіндіктерді алдын ала бағалауға жағдай жасау. Картадан қоныс аударушыларды қабылдайтын елді мекендер, жұмыс орындары, әлеуметтік инфрақұрылым және кеңес алуға қажетті байланыс деректері көрсетіледі.
Қандай мамандарға сұраныс жоғары?
Қоныстандыру өңірлеріндегі кадр қажеттілігі әр аймақтың еңбек нарығына қарай ерекшеленеді. Интерактивті картадағы мәліметтерге сәйкес, медицина саласында дәрігерлер мен мейіргерлерге, білім беру жүйесінде мұғалімдер мен мектепке дейінгі және орта білім педагогтеріне қажеттілік бар.
Техникалық және өндірістік салаларда түрлі бағыттағы инженерлер, электрмонтерлер, электриктер, дәнекерлеушілер мен токарьлар қажет. Ауылдық жерлерде агрономдар, ветеринарлар, механизаторлар, тракторшылар және жүргізушілерге сұраныс сақталып отыр.
Құрылыс саласында тас қалаушылар, бетоншылар, монтажшылар, әрлеушілер және басқа жұмысшы мамандарға бос жұмыс орындары ұсынылады. Бұдан бөлек, бухгалтерлер, экономистер, мемлекеттік және әлеуметтік қызмет көрсету саласының мамандары да қажет.
Сұранысқа ие кәсіптер тізімі тұрақты емес. Ол өңірлердегі нақты еңбек нарығының жағдайына қарай жаңартылып отырады. Сондықтан қоныс аударуды жоспарлаған адам карта арқылы өзінің мамандығына қай өңірде сұраныс жоғары екенін алдын ала тексере алады.
Картадан тағы қандай ақпарат алуға болады?
Интерактивті карта жұмыс іздеумен ғана шектелмейді. Азаматтар қоныс аударушыларды қабылдайтын нақты елді мекендер туралы мәлімет алып, ондағы әлеуметтік инфрақұрылым мен тұрмыс жағдайын бағалай алады.
Сервисте ерікті қоныс аударушыларға ұсынылатын мемлекеттік қолдау шаралары туралы ақпарат та жинақталған. Бұл көшу туралы шешім қабылдамас бұрын азаматқа жұмыс, тұрғылықты жер және мемлекет тарапынан көрсетілетін көмекті бір жерден салыстыруға мүмкіндік береді.
Бұрын мұндай мәліметтерді әртүрлі ресурстардан жеке іздеу қажет болса, енді негізгі ақпарат бір цифрлық алаңға біріктірілген. Бұл әсіресе басқа облысқа отбасымен көшуді жоспарлап жүрген азаматтарға қажетті шығындарды, жұмысқа орналасу мүмкіндігін және жаңа елді мекендегі жағдайды алдын ала саралауға көмектеседі.
Интерактивті картаны migration.enbek.kz порталынан пайдалануға болады. Өңірлердегі бос жұмыс орындары мен сұранысқа ие мамандықтар өзгеріп отыратындықтан, қоныс аудару туралы шешім қабылдар алдында картадағы өзекті мәліметтерді тексерген жөн.
