Асан Джалилов
Венгрияда өткен парламент сайлауының нәтижесінде оппозициялық «Тиса» партиясы басымдыққа ие болды. Елдің премьер-министрі Виктор Орбан жеңілгенін ресми түрде мойындады.
Алғашқы мәліметтерді Ұлттық сайлау комиссиясы мен халықаралық БАҚ жариялады.
Сайлау күні ел бойынша дауыс беру таңғы сағат 6-да басталып, кешке дейін жалғасты. 8 миллионнан астам сайлаушы Ұлттық ассамблеяның 199 депутатын таңдады. Алғашқы сағаттарда сайлаушылардың белсенділігі жоғары болды. Шетелдегі учаскелерде де ұзын кезектер тіркелген.
Саяси бәсеке негізінен Виктор Орбан жетекшілік ететін «Фидес» партиясы мен Петер Мадияр басқаратын «Тиса» партиясы арасында өтті. Соңғы сауалнамаларда оппозицияның алға шыққаны байқалған. Дауыс беру қорытындылары бойынша «Тиса» партиясы парламентте конституциялық басымдыққа жақын нәтиже көрсетті.
Алдын ала есептеулерге сәйкес, «Тиса» шамамен 138 мандатқа ие болуы мүмкін. Ал «Фидес» партиясы 50-ден астам орын алған. Сонымен қатар парламентке «Ми Хазанк» партиясы да өткен.
Сайлау нәтижесіне байланысты Виктор Орбан өз жақтастары алдында сөз сөйлеп, билікті жалғастыру мүмкіндігі болмағанын айтты. Ол жеңіске жеткен партияны құттықтағанын жеткізді.
Өз кезегінде Петер Мадияр жаңа үкімет құру қажеттігін мәлімдеп, қазіргі билікті отставкаға шақырды. Оның айтуынша, елде саяси өзгерістер кезеңі басталады.
Сайлау науқаны барысында тараптар әртүрлі бағыттағы бағдарламалар ұсынды. Орбан қауіпсіздік пен тұрақтылық тақырыбына басымдық берсе, Мадияр әлеуметтік сала, сыбайлас жемқорлықпен күрес және Еуропамен ынтымақтастық мәселелерін көтерді.
Осылайша, Венгриядағы парламент сайлауы елдің саяси бағытын айқындайтын маңызды кезеңге айналды. Жаңа құрамдағы парламент алдағы реформалар мен басқару жүйесіне өзгерістер енгізуі мүмкін.
