Асан Джалилов
Қазақстанда жоғары білім беру жүйесін жаңғыртуға бағытталған ауқымды өзгерістер қолға алынды. Негізгі мақсат — оқу бағдарламаларын еңбек нарығының нақты сұранысына сәйкестендіру.
Ғылым және жоғары білім министрі Саясат Нұрбектің айтуынша, «Жаңа мамандықтар атласы» жобасы аясында ел бойынша қажетті мамандықтар анықталған. Соның негізінде 8 мыңнан астам білім беру бағдарламасы қайта қаралып, шамамен 700-і жабылады.
Бұл шешім 73 мыңға жуық кәсіпорын арасында жүргізілген талдау нәтижесіне сүйеніп қабылданған. Енді оқу бағдарламалары әр өңір мен саланың нақты кадрлық қажеттілігіне бейімделеді.
Сонымен қатар инженерлік білім беру бағыты күшейтіледі. Жоғары оқу орындарында практикалық оқытуға басымдық беріліп, студенттердің өндірістік тәжірибеге қатысуы артады.
Бұдан бөлек, шетелдік университет филиалдарына қойылатын талаптар қайта қаралады. Атап айтқанда, оқытушылар құрамының бір бөлігі негізгі университеттен келуі тиіс, сондай-ақ қаржыландыру мәселесі де жеке реттеледі.
Министрдің айтуынша, барлық өзгерістер осы жылы қабылданып, жаңа оқу жылына дейін толық іске асырылады.
