Асан Джалилов
Жапония билігі әлемдегі ең ірі атом электр станциясын қайта іске қосу жөніндегі шешімді түбегейлі бекітті. Ниигата префектурасының заң шығарушы органы аймақтық дауыс беру нәтижесінде Касивадзаки–Карива атом электр станциясын қайта іске қосуды қолдаған губернатор Хидэе Ханадзумидің саясатын мақұлдады. Бұл шешім елдің энергетикалық стратегиясында маңызды бетбұрыс ретінде бағаланып отыр.
Жапонияның солтүстік-батысында, Токиодан шамамен 220 шақырым қашықтықта орналасқан Касивадзаки–Карива АЭС 2011 жылғы жойқын жер сілкінісі мен цунамиден кейін тоқтатылған болатын. Апаттан кейін елдегі 54 реактордың басым бөлігі жабылып, Жапония энергетикалық қауіпсіздікті қазба отыны импорты арқылы қамтамасыз етуге мәжбүр болды.
Содан бері билік атом энергетикасына біртіндеп қайта оралып келеді. Қазіргі таңда жұмысқа жарамды 33 энергоблоктың 14-і қайта іске қосылған. Ал Касивадзаки–Карива станциясындағы жеті реактордың алғашқысы 2026 жылдың қаңтарында іске қосылуы мүмкін. Жалпы қуаты 8,2 гигаватт болатын бұл АЭС бірнеше миллион үйді электр энергиясымен қамтамасыз етуге қауқарлы. Алдағы жылдары тағы екі блокты кезең-кезеңімен іске қосу жоспарланып отыр.
Жапония Үкіметі бұл қадамды энергетикалық тәуелсіздікті нығайту және импортталатын қазба отынына тәуелділікті азайту қажеттілігімен түсіндіреді. Ел өткен жылы сұйытылған табиғи газ бен көмір импортына 10,7 трлн иен жұмсаған. Бұл жалпы импорт шығынының елеулі бөлігін құрайды.
Сонымен қатар жасанды интеллект пен деректерді өңдеу орталықтарының қарқынды дамуы алдағы жылдары электр энергиясына деген сұранысты арттыруы мүмкін. Осыған байланысты Жапония 2040 жылға қарай энергетикалық теңгерімдегі атом энергиясының үлесін 20 пайызға дейін жеткізуді мақсат етіп отыр. Бұл елдің декарбонизациялау жөніндегі халықаралық міндеттемелерін орындауына да ықпал етпек.
