Зерттеушілер чат-боттардың сенімсіздігіне алаңдаулы

Астана. 2025 жылғы 27 қазан. Barbang Info – Еуропалық хабар тарату одағы (EBU) жүргізген жаңа зерттеу нәтижелеріне сәйкес, ChatGPT, Claude, Gemini және басқа да жасанды интеллектке негізделген чат-боттар өз жауаптарының шамамен 40 пайызына дейінгі бөлігін ойдан шығарып, оларды нақты дерек ретінде ұсынады. Бұл туралы DW агенттігі хабарлады. Tagesschau басылымының мәліметінше, әсіресе аймақтық жаңалықтар немесе бірнеше дереккөзден алынған ақпаратты біріктіру кезінде чат-боттар жиі жалған немесе бұрмаланған мәлімет береді. Мысалы, кей жағдайларда ChatGPT Рим Папасы Францискті тірі деп көрсетуі мүмкін, Microsoft Copilot Швецияның НАТО мүшелігін білмейді, ал Google Gemini АҚШ заңдарына қайшы түрде Дональд Трамптың қайта сайлануы мүмкін деген тұжырым жасайды. Зерттеу авторларының айтуынша, қолданушылар көбінесе жасанды интеллект ұсынған ақпаратқа сын көзбен қарамай, оны тексерусіз қабылдайды. Мұндай жағдай жалған мәліметтердің қоғамдық пікірге, тіпті сайлау науқандарындағы шешім қабылдау процесіне әсер ету қаупін арттырады. EBU сарапшылары азаматтарды жаңалықтарды тұтыну кезінде тексерілген және сенімді ақпарат көздеріне жүгінуге шақырды. Олар жасанды интеллекттің берген жауаптарын шынайы факт ретінде қабылдамау қажеттігін ерекше атап өтті. Мамандардың пікірінше, жасанды интеллект ақпараттық ізденісті жеңілдеткенімен, ол ешқашан адам санасының орнын баса алмайды. Сондықтан пайдаланушылар кез келген деректі бірнеше дереккөз арқылы тексеріп, сыни ойлау қабілетін сақтауы тиіс.