Бакыт Кулманов
Әлеуметтік желіде Фрэнк Каприоның қайтыс болғаны жайында ресми ақпарат жарияланды.
Каприо бүкіл әлемге қарапайым адамдарға деген жанашырлығы және әр ісіне адамгершілік тұрғысынан қарауымен танылды. Ол үшін заңның әр бабы тек жазалау емес, қоғамға әділдік пен мейірім сыйлайтын құрал болды.
Фрэнк Каприо Род-Айленд штатының Провиденс қаласында 38 жыл бойы муниципалды сотта қызмет етті. Осы уақыт ішінде ол мыңдаған істі қарап, қарапайым халықтың жағдайын түсінуге тырысқан.
Көпшілікке оның есімі «Caught in Providence» («Пойманные в Провиденсе») телешоуы арқылы кеңінен танымал. Бұл бағдарламада судьяның соттағы шынайы шешімдері көрсетіліп, оның адамгершілік пен әділдікті үйлестіре білуі миллиондаған көрерменнің жүрегін жаулап алды.
TikTok-та Фрэнк Каприоның 1,6 миллион жазылушысы болды. Телешоу төрт рет «Эмми» жүлдесіне ұсынылды. Әлемдік БАҚ оны «әлемдегі ең мейірімді судья» деп атады.
Каприоның ерекше қылығы – ол кейде айыппұл мөлшерін азайтып қана қоймай, шешім қабылдауға сотталушылардың балаларын да тартатын. Мұндай әрекеттер қоғамда жылы қабылданып, әлеуметтік желілерде миллиондаған қаралым жинады.
Фрэнк Каприоның өмірлік ұстанымы – заңнан бұрын адамға деген құрмет. Ол кішкентай мейірімнің де қоғамды өзгерте алатынын дәлелдеді. Оның есімі тек АҚШ-та ғана емес, бүкіл әлемде әділеттілік пен қайырымдылықтың символына айналды.
