Асан Джалилов
Қазақстандықтардың 68%-ы мемлекеттік мерекелерді отбасымен өткізеді. Әлеуметтік сауалнама нәтижесі ел тұрғындарының басым бөлігі мереке күндерін жақындарымен бірге атап өтетінін көрсетті.
Қазақстандық қоғамдық даму институты жүргізген зерттеуге сәйкес, респонденттердің 68%-ы мемлекеттік мерекелерді отбасымен бірге өткізетінін айтқан. Бұл көрсеткіш бірнеше өңірде ерекше жоғары болған.
Қай өңірлер көш бастап тұр
Сауалнама қорытындысында ең жоғары нәтиже Ұлытау облысында тіркелген. Мұнда қатысушылардың 97%-ы мерекені отбасы ортасында өткізетінін мәлімдеген. Батыс Қазақстан облысында бұл көрсеткіш 91,7%, ал Абай облысында 89,5% болған.
Мамандар мұны отбасылық дәстүрлердің қоғамдағы рөлі әлі де жоғары екенімен байланыстырады.
Достармен және қоғамдық шараларда
Респонденттердің 48,8%-ы мерекелерді достарымен, әріптестерімен немесе көршілерімен бірге өткізетінін айтқан. Мұндай үрдіс Батыс Қазақстан, Ақтөбе және Ұлытау облыстарында жиі байқалған.
Сонымен қатар қатысушылардың 36,4%-ы концерттерге, фестивальдерге және мерекелік шерулерге қатысатынын жеткізген.
Отбасылық формат күшейіп келеді
Сарапшылардың пікірінше, мемлекеттік мерекелер қазақстандықтар үшін жай ғана демалыс емес. Олар жақын адамдар арасындағы байланысты нығайтып, ортақ құндылықтарды дәріптейтін маңызды күнге айналып отыр.
Соңғы жылдары Қазақстанда мерекелерді отбасы ортасында атап өту үрдісі күшейе түскені байқалады.
