Асан Джалилов
Қазақстанның танымал теннисшісі Зарина Дияс кәсіби мансабын аяқтайтынын ресми түрде мәлімдеді. Бұл туралы спортшы өз әлеуметтік желідегі парақшасында хабарлады.
32 жастағы теннисші бұл шешімін өміріндегі маңызды кезеңдердің бірі ретінде бағалап, кәсіби спорттағы жолының аяқталғанын атап өтті. Оның айтуынша, бала күнгі арманы – әлемдік деңгейде өнер көрсету, турнирлерде жеңіске жету және үздік спортшылар қатарына қосылу болған.
Зарина Дияс өз мансабында халықаралық жарыстарда табысқа жетіп, әлемдік рейтингтің үздік 30 спортшысының қатарына енген. Сонымен қатар Олимпиада ойындарында Қазақстан намысын қорғап, ұлттық құрама сапында өнер көрсеткен.
Спортшы кәсіби жолында тек жеңістер ғана емес, қиын сәттер де болғанын атап өтті. Дегенмен ол теннис өзіне табандылықты, төзімділікті және алға ұмтылуды үйреткенін айтты. Оның сөзінше, бұл тәжірибе өмірінде әрдайым маңызды орын алады.
Зарина Дияс өзіне қолдау көрсеткен жанкүйерлеріне, отбасы мүшелеріне, бапкерлеріне, командасына және Қазақстан теннис федерациясына алғыс білдірді. Ол әсіресе анасының сенімі мен қолдауы ерекше рөл атқарғанын атап өтті.
Теннисші спорттан кету шешімін ризашылық сезімімен қабылдап отырғанын айтып, алдағы уақытта өмірінің жаңа кезеңі басталатынын жеткізді.
