Асан Джалилов
2025 жылы Қазақстанда мүгедектігі бар азаматтар Әлеуметтік қызметтер порталы арқылы оңалту қызметтерін белсенді пайдаланды. Еңбек және халықты әлеуметтік қорғау министрлігінің мәліметінше, бір жыл ішінде портал арқылы 595 мыңнан астам қызмет көрсетіліп, бұл жүйенің әлеуметтік қолдаудағы маңызын айқын көрсетті.
Жыл басынан бері портал арқылы барлығы 595,6 мың тапсырыс орындалған. Оның ішінде шамамен 440 мың азамат оңалтудың техникалық құралдарымен қамтамасыз етілсе, 9,8 мың адам ымдау тілі қызметін алды. Сонымен қатар 26,5 мың адам жеке көмекшінің көмегіне жүгінген, ал 119,3 мың азамат шипажайлық-курорттық емдеу қызметін пайдаланған.
Әлеуметтік қызметтер порталы мүгедектігі бар адамдарға қажетті құралдар мен қызметтерді өз бетінше таңдауға мүмкіндік береді. Қызметке тапсырыс беру электрондық цифрлық қолтаңба арқылы расталады, ал оңалтудың техникалық құралдары жеткізу арқылы немесе өздігінен алып кету жолымен ұсынылады. Бұл тәсіл қызмет алушылар үшін ашықтық пен ыңғайлылықты арттырып отыр.
Портал аясында протездік-ортопедиялық, сурдотехникалық, тифлотехникалық және гигиеналық құралдар, сондай-ақ кресло-арбалармен қамтамасыз ету қарастырылған. Қазіргі таңда жүйеде 595 арнаулы әлеуметтік қызмет көрсетуші, 1084 техникалық құрал жеткізушісі, 32 мыңнан астам жеке көмекші, 766 ымдау тілі маманы және 124 шипажайлық-курорттық емдеу ұйымы тіркелген.
Мамандардың айтуынша, порталдың тиімді жұмысы мүгедектігі бар азаматтардың қажетті қызметтерге қолжетімділігін арттырып, оңалту жүйесін заманауи әрі икемді форматқа көшіруге мүмкіндік беріп отыр.
