Асан Джалилов
Астанада Қазақстан халқы Ассамблеясының 30 жылдық мерейтойлық жылын қорытындылауға арналған «Бірлік пен келісім жолындағы 30 жыл» атты республикалық форум өтті. Іс-шараға Ассамблеяның өңірлік өкілдері, этномәдени бірлестіктердің көшбасшылары, жастар ұйымдары, ардагерлер мен волонтерлік қозғалыс өкілдері қатысты.
Қазақстан халқы Ассамблеясы Төрағасының орынбасары Марат Әзілханов форумның ашылуында мерейтойлық жыл аясында бүкіл ел бойынша 10 мыңнан астам іс-шара өткізілгенін, оған 1 миллионнан астам азаматтың қатысқанын атап өтті. Оның айтуынша, бұл көрсеткіш Ассамблея құрылымдарының үйлесімді жұмысы мен қоғамның белсенді қолдауының нәтижесі.
Форум барысында өңірлер телекөпір арқылы өздерінің үздік жобаларын таныстырды. Солардың ішінде Аналар кеңесінің «Жасыл сертификат» бастамасы мен Ақсақалдар кеңесінің «Адал азамат» жобасы ерекше аталды. Бұл бағдарламалар отбасы құндылықтарын нығайтуға, азаматтық жауапкершілікті арттыруға және әлеуметтік қолдау көрсетуге бағытталған.
Сондай-ақ форумда қазіргі қоғамның сұранысына сай жаңа бастамалар да ұсынылды. Олардың қатарында «Еңбеккерлер Ассамблеясы», «Жеңіс бірлікте», «Инклюзивті Ассамблея», «Шығармашылық шешімдер платформасы», «Елтану», «ҚХА-ның 50 жас көшбасшысы» сияқты ауқымды жобалар бар.
«Ассамблея жастары» қозғалысына да ерекше назар аударылды. Биыл жастар қазақстандық этноәлеуметтік келісім моделін ЮНЕСКО штаб-пәтерінде таныстырып, халықаралық деңгейде жоғары бағасын алғаны айтылды. Сонымен бірге, ел бойынша колледждер мен жоғары оқу орындарында Студенттік Ассамблеялар желісі кеңейіп жатқаны атап өтілді.
Форумда облыстарда ашылған жаңа комьюнити-орталықтар таныстырылып, жастарды қоғамдық жұмысқа қатыстыру бағытындағы жұмыстар қорытындыланды.
Ассамблеяның Медиация кеңесі, Жас ғалымдар клубы, Ғылыми-сарапшылық кеңес, «ҚХА академиясы» және Журналистер клубы жыл бойғы жұмысының нәтижелерін ұсынды. Бұл құрылымдардың қызметі этносаралық қатынастарды нығайтуға арналған білім беру мен практикалық дағдыларды дамытуға ықпал еткені айтылды.
Қайырымдылық бағытында «Жомарт жан» орталықтары жүзеге асырған 476 жобаның жалпы құны 300 миллион теңгеден асты. Бұл бастамалар әлеуметтік осал топтарға көмек көрсетуге, инфрақұрылымды жақсартуға және төтенше жағдайдан зардап шеккендерге қолдау көрсетуге бағытталды.
Шарада өңірлердегі 36 Достық үйіне қосылатын үш жаңа Достық үйінің құрылысы туралы бейнематериал көрсетілді. Сонымен бірге төрт өңірде құрылған аудандық Ассамблеялардың жұмысы таныстырылды.
Форум соңында Ассамблея ардагерлеріне 30 жылдық кезеңде атқарған еңбектері үшін құрмет көрсетіліп, арнайы кітаптың таныстырылымы өтті. Бұл жинақ елдегі бейбітшілік пен келісімге үлес қосқан азаматтарға деген алғыс белгісі ретінде ұсынылды.
Форум мерейтойлық жылды қорытындылап қана қоймай, алдағы кезеңдегі қоғамдық келісім мен этносаралық бірлікті нығайту бағыттарын айқындап берді.
