Асан Джалилов
Астанада «Бірлік көпірі» мәдени-ағартушылық жобасы аясында жастар ұйымдарының өкілдері мен жоғары оқу орындарының студенттері үшін Қазақстан-неміс орталығына таныстыру экскурсиясы өтті.
Іс-шараны ҚР Мәдениет және ақпарат министрлігі Этносаралық қатынастарды дамыту комитетінің «Қоғамдық келісім» РММ және «Қазақстандық немістердің «Возрождение» бірлестігі» қоғамдық қоры ұйымдастырды.
Экскурсия барысында қатысушылар орталықтың қызметімен, мәдени және білім беру жобаларымен, сондай-ақ Қазақстандағы неміс этносының тілі мен тарихи мұрасын сақтауға бағытталған бастамалармен танысты.
Қазақстан-неміс орталығы қандай жобаларды жүзеге асырады
Ұйымдастырушылардың мәліметінше, 2021 жылы ашылған Қазақстан-неміс орталығы бүгінде мәдениетаралық диалог пен жастар бастамаларын дамытуға арналған маңызды алаңдардың біріне айналған.
Қазіргі уақытта орталықта мәдени іс-шаралар, тіл курстары, шығармашылық байқаулар, көрмелер, концерттер және жастарға арналған кездесулер тұрақты түрде өткізіледі.
Кездесу барысында «Қазақстандық немістердің «Возрождение» бірлестігі» қоғамдық қорының қоғамдық келісімді нығайтудағы және этносаралық достықты дамытудағы рөліне ерекше назар аударылды.
Сондай-ақ студенттер мен жастар орталықтың шеберлік сағаттары, мәдени бағдарламалары және толеранттылықты насихаттауға бағытталған жобалары туралы ақпарат алды.
Ұйымдастырушылардың айтуынша, «Бірлік көпірі» жобасы жастардың танымдық белсенділігін арттыруға, мәдени мұраға құрметті қалыптастыруға және қоғамдық келісімді нығайтуға бағытталған.
