Асан Джалилов
Қазақстанның оңтүстік өңірлерінде Ауғанстан аумағында болған жер сілкінісінің дүмпуі сезілді. Бұл ақпаратты ҚР Төтенше жағдайлар министрлігінің Сейсмологиялық-бақылау және зерттеу ұлттық орталығы растады.
Орталықтың мәліметінше, 3 қараша күні Астана уақыты бойынша сағат 01:29-да тіркелген жер сілкінісінің эпицентрі Алматы қаласынан оңтүстік-батысқа қарай шамамен 1079 шақырым жерде, Ауғанстан аумағында орналасқан. Зілзаланың магнитудасы MPV 6.2 деңгейінде анықталды, тереңдігі 120 шақырымды құрады.
Сейсмикалық дүмпу Шымкент қаласында және Түркістан облысының Мақтаарал, Жетісай және Шардара аудандарында шамамен 2 балл деңгейінде сезілген. Төтенше жағдайлар министрлігі қазіргі уақытта зардап шеккендер мен қираулар туралы ақпарат түспегенін хабарлады.
Мамандар жағдайды бақылауда ұстап отыр.
