Бакыт Кулманов
Алматы. 1 қазан 2025 жыл. Barbang Info. Қазақстанда шетелдік интернет-компанияларға қосылған құн салығы (ҚҚС) енгізілгеннен бері бюджетке 111,6 миллиард теңге түсті. Тек 2025 жылдың өзінде бұл көрсеткіш 41,8 миллиард теңгені құрап, өткен жылмен салыстырғанда 18,8 миллиард теңгеге артқан.
2025 жылы ең ірі салық төлеушілер Temu (6,2 млрд теңге), Valve Corporation (5,3 млрд теңге) және Apple (5,2 млрд теңге) болды.
ҚҚС енгізілгеннен бері Қазақстанда 116 шетелдік интернет-компания шартты түрде тіркелген. 2025 жылы 18 жаңа компания тіркеуден өтті. Олардың қатарында Chess.com, OpenAI, Canva Pty Ltd, және «Окко» компаниясы бар.
Жаңадан салық төлей бастаған ірі платформалар қатарында Next Retail Ltd. – 283 миллион теңге және Alibaba.com – 142 миллион теңге көлемінде салық төледі.
Мемлекеттік кірістер комитеті 2026 жылдың 1 қаңтарынан бастап жаңа талаптар күшіне енетінін хабарлады. ҚҚС төлеуден жалтарған немесе шартты тіркеуден өтпеген интернет-компаниялар Қазақстан аумағында бұғатталуы мүмкін. Мұндай компаниялардың тізімі уәкілетті органмен жасалып, ресми сайтта ашық түрде жарияланатын болады.
