Бакыт Кулманов
Жүздеген ата-аналар Калифорниядағы ұйымдастырылған шерулерге қатысты. Олар штат билігінің балаларға арналған вакцина мандатын қабылдауына қарсы екенін ашық білдірді. Ата-аналар өздерінің негізгі уәжі ретінде балаларының денсаулығына қатысты шешім қабылдау құқығын сақтау керектігін айтты. Көпшілігі бұл қадамды ата-аналық құқықтарды шектеу деп қабылдады.
Калифорния билігі мұндай қадамға COVID-19 вирусының таралуын азайту және мектептерде оқу процесін қауіпсіз ету мақсатында барғанын мәлімдеді. Штат губернаторы Гэвин Ньюсом бұл мандаттың балалардың, мұғалімдердің және отбасылардың денсаулығын қорғау үшін қажет екенін баса айтты.
Вакцинация мандаты мектепке баратын 12 жастан асқан балаларға арналған. Кейбір аудандарда бұл талап балабақша мен бастауыш мектеп оқушыларына да таралуы мүмкін деген болжамдар айтылуда.
Калифорния тұрғындарының арасында бұл мандатқа деген көзқарас екіге жарылды. Бір тарап оны ғылыми негізделген, денсаулық сақтау тұрғысынан маңызды шешім деп есептесе, екінші тарап ата-аналар мен балалардың таңдау еркіндігіне нұқсан келтіреді деп алаңдауда.
Американдық денсаулық сақтау ұйымдары балаларға арналған вакцина қауіпсіз екенін мәлімдегенімен, кейбір ата-аналар вакцинаның ұзақ мерзімді әсеріне күмәнмен қарайды. Сонымен қатар, олар балалардың COVID-19-ды жеңіл өткеретінін алға тартып, вакцина алудың қажеттілігіне күмән келтіреді.
