Асан Джалилов
Қазақстан құрамасы садақ атудан Таиландтың Бангкок қаласында өтіп жатқан Азия кубогының алғашқы кезеңінде тағы да жүлделі орындарға ие болды.
Ерлер арасындағы классикалық садақ ату сайысында қазақстандық спортшылар жоғары нәтиже көрсетіп, алтын медаль жеңіп алды. Финалдық бәсекеде Ильфат Абдуллин, Дәулеткелді Жаңбырбай және Дастан Кәрімов Үндістан құрамасын тартысты кездесуде 5:4 есебімен жеңді.
Әйелдер құрамасы да үздік нәтиже көрсетіп, жарысты бірінші орынмен аяқтады. Шешуші кезеңде Александра Землянова, Самира Жұмағұлова және Диана Тұрсынбек Қытай спортшыларынан басым түсіп, 6:2 есебімен жеңіске жетті.
Сонымен қатар блоктық садақ атудан аралас командалық сайыста Виктория Лян мен Бунед Мирзаметов қола жүлдеге ие болды. Олар Сингапур құрамасын 152:151 есебімен ұтып, үшінші орынды еншіледі.
Осылайша, Қазақстан құрамасы Азия кубогының алғашқы кезеңінде жоғары нәтиже көрсетіп, халықаралық аренадағы өз позициясын тағы бір мәрте нығайтты.
