Асан Джалилов
Қазақстанда іске асырылып жатқан «Ұлттық қор – балаларға» бағдарламасы 2026 жылы да жалғасады және сол жылы 18 жасқа толатын балалар да бұл бастаманың қатысушысы болып қала береді. Бұл туралы «Бірыңғай жинақтаушы зейнетақы қоры» АҚ ресми түсініктеме берді.
БЖЗҚ мәліметінше, 2025 жылғы 31 желтоқсанның қорытындысы бойынша Қазақстан Республикасының азаматы болып саналатын барлық бала автоматты түрде «Ұлттық қор – балаларға» бағдарламасына енгізілген. Яғни, 2026 жылы 18 жасқа толатын балалар да осы санатқа жатады және бағдарлама шеңберінде қаражат алу құқығын сақтайды.
Аталған балаларға аударылатын қаржы нысаналы талаптар ретінде олардың БЖЗҚ-да ашылған нысаналы жинақтау шоттарына есептеледі. Бұл қаражат бала 18 жасқа толғанға дейін жинақ түрінде сақталып, кейін белгіленген мақсаттар үшін пайдалануға мүмкіндік береді.
2026 жылға арналған бір балаға тиесілі нысаналы талаптардың нақты мөлшері бірнеше көрсеткішке байланысты айқындалады. Атап айтқанда, есептеу кезінде 2025 жылғы 31 желтоқсан соңындағы жағдай бойынша Қазақстан азаматтығы бар балалардың жалпы саны және Ұлттық банктен алынатын Ұлттық қордан бөлінген қаражаттың жиынтық көлемі негізге алынады.
Бағдарлама іске қосылған уақыттан бері оған деген қызығушылық жоғары. Биылғы 1 тамыздағы дерекке сәйкес, БЖЗҚ жалпы сомасы 16,51 млн АҚШ долларын құрайтын 126 468 өтінішті орындаған.
Еске сала кетейік, «Ұлттық қор – балаларға» бағдарламасы ресми түрде 2024 жылғы 1 қаңтарда басталды. Оның аясында 2006 жылдан бастап туған әрбір балаға Ұлттық қор қаражаты жыл сайын аударылып отырады. Бұл бастама жас ұрпақтың болашағын қаржылық тұрғыдан қолдауға және әлеуметтік әділеттілікті нығайтуға бағытталған.
