Асан Джалилов
Қазақстандағы банк жүйесі тұрақты жағдайда, ал салымшылар үшін жүйелі қауіп жоқ. Бұл туралы Қаржы нарығын реттеу және дамыту агенттігінің төрағасы Мәдина Әбілқасымова Сенаттың жалпы отырысында мәлімдеді.
Оның айтуынша, бүгінде банктердің өтімді капиталы жеткілікті, ал қадағалау жүйесі ықтимал тәуекелдердің алдын алуға бағытталған. Агенттік жыл сайын банктердің активтер сапасын бағалап, несие портфельдерін талдайды, сондай-ақ стресс-тестілеу арқылы олардың дағдарыс жағдайларына төзімділігін тексереді. Бұдан бөлек, әр банктің бизнес-моделі, корпоративтік басқаруы және басқа да тәуекелдері кешенді түрде қаралады. Осы бағалаулардың негізінде банкроттыққа жол бермеу үшін алдын алу шаралары қабылданады.
Мәдина Әбілқасымова банкроттық сатысына өткен қаржы ұйымдарына мемлекеттік қолдау көрсетілмейтінін атап өтті. Қолданыстағы заңнамаға сәйкес, мұндай банктер тарату рәсімінен өтеді. Қазіргі таңда лицензиялары 2007–2021 жылдар аралығында қайтарып алынған тоғыз банк тарату процесінде тұр.
Агенттік басшысы өткен жылдары мемлекеттік қолдау тек қаржылық жағдайын қалпына келтіруге қабілетті банктерге ғана көрсетілгенін еске салды. Атап айтқанда, 2017 жылы іске қосылған қаржылық тұрақтылық бағдарламасы аясында алты банкке жалпы көлемі 1,8 триллион теңге көлемінде қолдау берілген. Соның ішінде үш банк бұл қаражатты мерзімінен бұрын қайтарып, бюджетке 738 миллиард теңге аударған. Қалған үш банк те мемлекеттік қолдауды белгіленген мерзімнен ертерек өтеуді жоспарлап отыр.
Агенттік мәліметінше, банк секторындағы қадағалау шаралары алдағы уақытта да күшейтіліп, қаржы жүйесінің тұрақтылығын сақтауға бағытталады.
