РЕСПУБЛИКА КҮНІ – ҰЛТТЫҚ МАҚТАНЫШ МЕРЕКЕСІ

Республика күні – әрбір азамат үшін ұлттық мақтаныш пен елдік сана мерекесіне айналуы тиіс.
Бұл – біздің мемлекетіміздің тарихи дамуы мен тәуелсіздік жолындағы ұлы жетістіктерін айшықтайтын ерекше күн.

Әлем елдерінде Республика күні ең маңызды ұлттық мереке ретінде атап өтіледі. Қазақстанда да бұл күн – ел бірлігі мен мемлекеттік егемендіктің символы. Еліміздің жаңа саяси басшылығы құқықтық жүйені жетілдіру арқылы демократиялық институттарды қалыптастыруда, өркениетті елдердің тәжірибесіне сүйене отырып, даму бағытын айқындап келеді. Тарих көрсеткендей, реформалардың табысты жүзеге асуы халықтың жүрегінде осы тарихи күннің мәңгі ұялап қалуына негіз болды. Мұның барлығы, ең алдымен, елге бағыт-бағдар беріп отырған тұлғаның – Қазақстан Республикасының Президенті Қасым-Жомарт Кемелұлы Тоқаевтың сарабдал саясаты мен жетекшілігінің нәтижесі. Қазақстан – Еуразия құрлығының дәл жүрегінде орналасқан, ұлы Сарыарқаның төсінде өзінің дара өрнегімен және сенімді қадамдарымен тұрақтылық пен дамудың үлгісін көрсетіп отырған мемлекет. Елдің ұзақмерзімді стратегиясы аясында инновациялық-индустриялық даму бағыты дәйекті түрде жүзеге асуда. Биыл Қазақстан Мемлекеттік егемендік туралы декларацияның қабылданғанына 35 жыл толып отыр. Бүгінде еліміз өзінің жаңа сапалы даму кезеңіне аяқ басты. Біз әлемнің бәсекеге қабілетті мемлекеттері қатарынан лайықты орын алдық. Тәуелсіздіктің құны мен маңызын ешқандай өлшеммен бағалау мүмкін емес. Ұлы ағартушы Ыбырай Алтынсариннің: «Қазақ халқы азбаған, табиғаты таза халық. Оның талабы біреудің тар шеңберіне сыймайды» – деген сөзі бүгін де өзекті.
Біз, Қазақстанда тұратын өзге ұлт өкілдері, осы киелі топырақта өмір сүріп жатқанымызды үлкен мақтаныш санаймыз. Республика туы көтерілген сәттен бастап халқымыздың жүрегіне үміт ұялады, жерімізге береке дарыды. Тәуелсіздікті нығайту жолы оңай болған жоқ. Бірақ біз сол сындарлы кезеңдерден абыроймен өтіп, елдің еңсесін тіктедік. Қазір Қазақстан — әлемдік қауымдастықта өз орнын айқындаған, беделді әрі белсенді мемлекет. Тәуелсіздік – ата-бабамыздың ғасырлар бойғы асқақ арманы еді. Сол арманның жүзеге асуы – бүгінгі ұрпақтың басты жауапкершілігі. Біз осы елдің тыныштығын, бейбітшілігін және бірлігін сақтау арқылы ғана болашағымызды баянды ете аламыз. Алдағы мақсатымыз – егемендігімізді нығайту, ел дамуына барынша үлес қосу және Тәуелсіз Қазақстанды кемел келешекке бастау.

Рафик Мирзоев,
Қазақстан халқы Ассамблеясы Кеңесінің мүшесі,
Қазақстан күрдтері «Барбанг» қауымдастығы басқарма кеңесінің төрағасы