Асан Джалилов
Қазақстан Республикасының халықаралық дәрежедегі спорт шебері Ахмедов Ахмед Абдужамалович – пара дзюдо мен самбо спортында ел намысын абыроймен қорғап жүрген қайсар да қажырлы спортшы. Оның өмір жолы – төзімнің, табандылықтың, қайсар рухтың және арман жолында қажымай-талмай еңбек етудің көрінісі.
Ахмедов Ахмед жастайынан қиындықты жеңуге, өз мүмкіндіктерін дәлелдеуге талпынған балалардың бірі болды. Қарапайым отбасында дүниеге келген ол спортты тек дене шынықтыру емес, адам рухын тәрбиелейтін ұлы мектеп деп түсінді. Татамидегі әрбір жеңіс – оның күнделікті еңбегінің, төгілген терінің, жанкешті машықтанудың нәтижесі.
Спорттағы жарқын жолы 2020 жылы басталды. Сол жылы Ахмед Қазақстан кубогында жеңіс тұғырының ең биік сатысына көтерілді. Бұл жеңіс ел спортында жаңа есімнің жарқырап шыққанын білдірді.
2021 жылы ол халықаралық гран-при турнирінде 2-орынды иеленіп, әлемдік аренада да бәсекеге қабілетті екенін дәлелдеді. Ал 2022 жылғы Азия ойындарындағы қола медаль оның спорттағы тұрақты әрі сенімді өсу жолын көрсетті.
2023 жылы Ахмед самбодан Азия чемпионы атанып, өз салмағында сөзсіз көшбасшы екенін дәлелдеді. Бұл жеңіс оның спорттық мансабындағы үлкен белес болды.
2025 жылғы Азия чемпионатында да ол қарсыластарына дес бермей, 1-орынды иеленді. Талайдың маңдайына бұйырмайтын табысқа қол жеткізген Ахмед ел спортындағы беделін одан әрі нығайтты.
Жылдың басты бәсекелерінің бірі – Қазақстан Республикасы чемпионатында 2-орын иеленіп, ол үздіктер қатарындағы орнын нақтылады.
Ал 2025 жылдың 8 қарашасы күні Астана қаласында өткен пара дзюдодан Азия чемпионатында Ахмед ел сенімін тағы ақтап, 2-орынға ие болды. Бұл нәтиже – оның шеберлігінің, шынайы кәсіби деңгейінің және биік рухының айқын дәлелі.
Ахмедов Ахмед Абдужамалович – спорттағы жетістігімен ғана емес, өмірге деген құлшынысымен, еліне деген адалдығымен, жастарға үлгі боларлық мінезімен де ерекшеленетін тұлға. Оның әрбір жеңісі – жас буынға шабыт, елге қуаныш, спортқа деген құрметтің көрінісі.
Елі үшін тер төгіп жүрген пара дзюдо мен самбо шеберінің жолы әлі де жалғасып келеді. Алда оны жаңа белестер, жаңа жеңістер күтіп тұрғаны анық.
