Em Ne Kurdên Sovyetê ne, Em Kurdên Qefqasyayê ne!

Tîblîsî — Gurcîstan: Nivîskar û lêkolînerê Kurd, Hejarê Şamil, di daxuyaniyekê de bal kişand ser bikaranîna têgîna «Kurdên Sovyetê» û diyar kir ku ev wesf ne rast e û heqaretê li dîroka Kurdên li herêma Qefqasyayê dike. Şamil bi tundî destnîşan kir ku divê ji Kurdên vê herêmê re «Kurdên Qefqasyayê» bê gotin. Hejarê Şamil ku beşdariyê li gotûbêjeke Utopya Tv ya di derbarê Konferansa Kurdên Qefqasyayê — II kiribû, anî ziman ku Kurd 3000 sal in li Qefqasyayê niştecih in û xwedî dîrokeke kevnar in li vê erdnîgariyê. Wî got, «Ji me re dibêjin ‘Kurdên Sovyetê’, lê ev terim, ev wesf ne rast e. Em 3000 sal in li Qefqasyayê ne, û Kurd niştecihên Qefqasyayê ne.» Şamil rexne li bikaranîna domdar a vê têgînê girt û bi bîr xist ku Yekîtiya Sovyetê ji zêdetirî 30 salan ve hilweşiyaye. Wî destnîşan kir ku piştî hilweşîna Sovyetê êdî kes behsa «Ermeniyên Sovyetê», «Rûsên Sovyetê» an «Tacîkên Sovyetê» nake. Şamil anî ziman ku ev cudaxwazî ye û got, «Ez têgîna ‘Kurdên Sovyetê’ wek heqaret dibînim.» Li gorî Şamil, hemû Kurdên ku îro li Rûsya, Ukrayna, Qazaxistan, Qirgizistan û hemû welatên berê yên Sovyetê dijîn, bi eslê xwe Kurdên Qefqasyayê ne. Wî daxwaz kir ku ji bo nasname û dîroka Kurdên vê herêmê rastî bê gotin û ev têgîna xelet êdî neyê bikaranîn. Daxuyaniya Hejarê Şamil li ser medyaya civakî û di nav civaka Kurdan de bibû sedema nîqaşan û bal kişand ser girîngiya bikaranîna têgînên rast di danasîna nasnameyên neteweyî de. Çavkanî pressin.info/kurdi/