Бакыт Кулманов
2026 жылғы 25 ақпанда Ақордада ХХV Қысқы Олимпиада ойындарының чемпионы Михаил Шайдоров пен оның жаттықтырушыларын марапаттау рәсімі өтті.
Президент Қасым-Жомарт Тоқаев өз сөзінде спортшының жетістігін ерекше атап өтті:
– «Бұл – 32 жылдан кейінгі тарихи жүлде және мәнерлеп сырғанаудан ел қоржынына түскен алғашқы Олимпиада алтыны. Михаил көк Туымызды Олимп шыңына көтерді. Темірдей тәртіппен, тынымсыз еңбек еткен адам ғана осындай табысқа жетеді. Халқымыз Михаилды мақтан тұтады, ал жас буын одан үлгі алады», – деді Мемлекет басшысы.
Президент чемпионның әкесі әрі алғашқы бапкері Станислав Шайдоровқа және жаттықтырушы Алексей Урмановқа алғыс білдіріп, бұл жеңіс бүкіл ел үшін зор мәртебе екенін айтты.
Марапаттау барысында Михаил Шайдоров ІІ дәрежелі «Барыс» орденімен наградталды.
Өз кезегінде Олимпиада чемпионы да ризашылығын білдірді:
– «Бұл алтын медаль – менің ғана емес, ата-анамның, бапкерлерімнің және барша қазақстандықтың жеңісі. Аянбай еңбек етсең, жақын жандардың сенімі болса, армандар орындалады. Мен Олимпиада алтынымен шектелмеймін. Елімнің сенімін ақтап, халқымның мерейін үстем ету үшін еңбек етемін. Сүйікті Отаныма қызмет етемін», – деді Михаил Шайдоров.
