Тоқаев парламенттік реформалар аясында Конституцияның шамамен 40 бабына өзгеріс енгізуді ұсынды

Астана. 14 қазан 2025 жыл. Barbang Info – Қазақстан Президенті Қасым-Жомарт Тоқаев парламенттік реформаны әзірлеу жөніндегі жұмыс тобының алғашқы отырысында Конституцияның шамамен 40 бабына өзгерістер енгізу жоспарын жариялады. Президенттің айтуынша, конституциялық түзетулерден кейін кемінде 10 конституциялық заң және 50-ден астам кодекс пен өзге заңдар жаңартылатын болады. Реформаның негізгі мақсаты — бір палаталы парламент жүйесіне көшу және оны пропорционалды сайлау жүйесі негізінде қалыптастыру. Бұл тәсіл депутаттар корпусының кәсібилігін арттырып, заң шығару процесін анағұрлым тиімді етуді көздейді. Президент атап өткендей, парламенттік реформа елдің цифрлық трансформация үдерісімен үндес жүзеге асырылады. Жаңа кезеңде жасанды интеллект пен e-Gov сервистерін кеңінен енгізу, ал болашақта e-Parliament жүйесін құру арқылы заң шығару қызметінің ашықтығын және азаматтардың қатысу деңгейін арттыру жоспарлануда. Қасым-Жомарт Тоқаев шешімдер асығыс қабылданбайтынын, олардың кең қоғамдық талқылаудан және сараптамалық бағалаудан өтетінін атап өтті. Бұл процеске e-Otinish және e-Gov электрондық платформалары да тартылады. Мемлекет басшысы реформаның басты мақсаты — азаматтардың құқықтарын қорғау және «Күшті Президент – ықпалды Парламент – есеп беретін Үкімет» қағидатын одан әрі нығайту екенін баса айтты.