Асан Джалилов
Қазақстанда жас ғалымдарды қолдау саясаты нақты нәтижелермен жалғасып келеді. Мемлекет басшысының тапсырмасына сәйкес, отандық ғылымды дамытуға үлес қосып жүрген жас зерттеушілерге тұрғын үй беру бастамасы кезең-кезеңімен жүзеге асырылуда. Соның аясында ҚР Ғылым және жоғары білім министрі Саясат Нұрбек 10 жас ғалымға жаңа пәтерлердің сертификаттарын салтанатты түрде табыстады.
Бұл қадам жас зерттеушілердің әлеуметтік жағдайын жақсартып қана қоймай, ғылымға келіп жатқан талантты жастарды елде ұстап қалуға, олардың ғылыми әлеуетін толық іске асыруына мүмкіндік беруге бағытталған. Министрлік өкілдерінің айтуынша, тұрмыстық мәселеден босатылған ғалымдар енді өз уақытын жаңа жобаларға, зерттеулерге және инновациялық идеяларды жүзеге асыруға арнай алады.
Баспана алғандардың қатарында Л. Н. Гумилев атындағы Еуразия ұлттық университетінің биотехнология және микробиология кафедрасының доценті Жадырасын Нұрбекова да бар. Ол ғылым жолына студенттік кезден түскенін атап өтіп, көрсетілген қолдау жас мамандарға үлкен мотивация беретінін жеткізді. Ғалымның айтуынша, мұндай сенім мен қамқорлық ғылыми ортада тұрақтылық қалыптастырып, кәсіби өсуге жол ашады.
Пәтер иегерлерінің қатарында С. Сейфуллин атындағы Қазақ агротехникалық зерттеу университетінің Энергетика институтында еңбек ететін қауымдастырылған профессор Ермек Сарсикеев те бар. Ол мемлекет тарапынан ғылым мен білім саласына көрсетіліп отырған қолдаудың маңызын атап өтіп, бұл бастамалар жас ғалымдардың әлеуетін ашуға, зерттеу сапасын арттыруға және жоғары білімнің дамуына серпін беретінін айтты.
Жалпы алғанда, жас ғалымдарды тұрғын үймен қамту – адам капиталына басымдық берудің, ғылымды стратегиялық сала ретінде дамытуға бет бұрған мемлекеттік саясаттың айқын көрінісі. Мұндай шаралар ғылыми ортадағы тұрақтылықты нығайтып, жаңа буын зерттеушілерді елдің зияткерлік дамуына белсенді атсалысуға ынталандырады.
