Асан Джалилов
Қазақстанда 60 жастан асқан азаматтарға арналған теміржол билеттеріне жаңа жеңілдік қолданысқа енгізілді. Енді ел ішінде пойызбен сапарлайтын зейнеткерлер билеттерді 25 пайыздық жеңілдікпен ала алады. Бұл мүмкіндік арнайы QURMET дисконттық картасы арқылы жүзеге асырылады және ұлттық тасымалдаушының барлық пойыздарында жарамды.
QURMET дисконттық картасы купе, плацкарт және отыратын вагондарда орын санына шектеусіз билет рәсімдеуге мүмкіндік береді. Картаның құны 3000 теңге, ал жарамдылық мерзімі сатып алынған күннен бастап бір жылды құрайды. Жеңілдікті пайдалану үшін жолаушыда аталған дисконттық карта болуы жеткілікті.
Сонымен қатар жастарға арналған жаңа KETTİK33 дисконттық картасы да енгізілді. Бұл карта арқылы 15 пен 25 жас аралығындағы жолаушылар купе вагондарындағы жоғарғы орындар мен отыратын вагондарға билеттерді 33 пайыз жеңілдікпен сатып ала алады. Жастар картасының құны да 3000 теңге, жарамдылық мерзімі — бір жыл.
Дисконттық карталар тек иесінің атына рәсімделеді және басқа адамдардың пайдалануына берілмейді. Картаны теміржол вокзалдарындағы билет кассаларынан жеке куәлік, ұялы телефон нөмірі және қалау бойынша электрондық пошта мекенжайын көрсету арқылы алуға болады. Жеңілдіктер билет кассаларынан немесе ресми сайт арқылы сатып алынған билеттерге ғана қолданылады, ал екінші деңгейлі банктердің платформалары арқылы алынған билеттерге жеңілдік қарастырылмайды.
Жеңілдіктер жыл сайын белгіленген кезеңде ұсынылады. Алайда мерекелік және демалыс уақыттарында дисконттық карталардың қолданылуы уақытша тоқтатылады. Атап айтқанда, 2026 жылғы 20–29 наурыз, 25–30 желтоқсан аралығы және маусымнан тамызға дейінгі кезеңдерде жеңілдіктер қолданылмайды.
Осылайша, жаңа дисконттық бағдарламалар зейнеткерлер мен жастардың ел ішінде пойызбен қатынауын қолжетімді етіп, әлеуметтік қолдауды кеңейтуге бағытталған.
