Асан Джалилов
Өзбекстанда оқу мәдениетін дамытуға бағытталған жаңа бастама қолға алынды. Ел президенті Шавкат Мирзиёевтің «Оқу мәдениетін дамыту және халықтың кітапқа қызығушылығын арттыру жөніндегі шаралар туралы» қаулысына сәйкес, мемлекеттік қызметшілер арасында кітап оқуды ынталандыру тетіктері енгізіледі.
Құжаттың басты мақсаты — 2030 жылға қарай әрбір азаматтың жылына кемінде 10 кітап оқу дағдысын қалыптастыру. Осы мақсатта мемлекеттік секторда нақты ынталандыру шаралары қарастырылған. Атап айтқанда, министрліктер мен ведомстволарда өткізілетін арнайы конкурстардың нәтижесі бойынша ең көп кітап оқыған қызметкерге бір айлық жалақы мөлшерінде ақшалай сыйақы төлеу көзделген.
Сонымен қатар, биылғы 1 сәуірге дейін барлық мемлекеттік мекемелерде қызметкерлерге арналған «Кітап бұрыштары» ашылады. Әр мекемеде ай сайын «Кітап оқу сағаттары» ұйымдастырылып, оған қатысушылардың белсенділігі негізінде ішкі рейтинг қалыптастырылады.
Билік өкілдерінің айтуынша, бұл шаралар мемлекеттік қызметшілердің зияткерлік деңгейін арттыруға, ой-өрісін кеңейтуге және қоғамда кітап оқуға деген оң көзқарасты нығайтуға бағытталған. Өзбекстанда оқу мәдениетін жүйелі түрде қолдау елдің адами капиталын дамытудағы маңызды қадам ретінде қарастырылып отыр.
