Асан Джалилов
Шымкент қаласында Францияның Құрметті консулдығының салтанатты түрде ашылуы өңірдің халықаралық байланыстар картасында жаңа белес болып отыр. Бұл қадам екі жақты серіктестікті тек дипломатиялық деңгейде ғана емес, экономикалық, мәдени және ғылыми бағыттарда да тереңдетуге мүмкіндік береді.
Қала әкімдігінің хабарлауынша, консулдықтың ашылуы 2025–2028 жылдарды қамтитын бірлескен Ынтымақтастық жөніндегі жол картасы аясында жүзеге асқан. Бұл құжат келесі жылдары Шымкент пен Франция арасында жаңа жобалардың, инвестициялық бастамалардың және мәдени алмасулардың жандануына негіз болмақ.
Францияның Құрметті консулдығы өңірдегі азаматтар мен бизнеске бірқатар маңызды қызмет көрсетеді. Атап айтқанда, сауда-экономикалық ынтымақтастықты нығайту, Қазақстандағы француз азаматтарының құқығы мен мүдделерін қорғау, құжат рәсімдеуге жәрдем беру, сондай-ақ француз тауарлары мен қызметтерін жергілікті нарыққа ілгерілету бағытында жұмыс істейтін болады. Бұдан бөлек, ғылым, білім және мәдениет саласындағы бірлескен іс-шараларды ұйымдастыруға қолдау көрсетілмек.
Жаңа консулдықтың ашылуы – Шымкенттің халықаралық әріптестікке ашық, динамикалық қалаға айналып келе жатқанын айқын дәлелдейді. Бұл бастама өңірдің жаһандық деңгейдегі беделін арттырып, шетелдік инвестициялар мен серіктестік мүмкіндіктерін кеңейтуге жол ашады.
