Саркози Санте түрмесіне жеткізілді

Франция. 22 қазан 2025 жыл. Barbang Info – Бұрынғы Франция президенті Николя Саркози Париждегі Санте түрмесіне жеткізілді. Ол 2007 жылғы президенттік сайлау науқанын Ливия билігі заңсыз қаржыландырды деген іс бойынша бес жылға бас бостандығынан айырылған болатын.

Саркози қамауға алынардан бұрын Франция президенті Эмманюэль Макронмен жасырын кездесіп, Елисей сарайында бір сағаттан астам уақыт өткізді. Ресми ақпарат бойынша, бұл кездесу туралы алдын ала жарияланбаған және оның мазмұны құпия күйінде қалды.

Сол күні таңертең Саркози жұбайы, әнші әрі модель Карла Брунимен қоштасып, полиция көлігімен Санте түрмесіне жеткізілді. Жол бойы жиналған жақтастары Франция тулары мен «Николя, тезірек қайт!» деген ұрандармен саясаткерді қолдап, қошемет көрсетті.

Саркози 11 шаршы метрлік жеке камераға орналастырылды. Қорғаушыларының айтуынша, бұл шешім оның қауіпсіздігін қамтамасыз ету мақсатында қабылданған. Түрмедегі камерада терезе ашылмайды, теледидар бар, бірақ ұялы телефон пайдалануға рұқсат етілмейді. Саясаткерге күніне бір сағаттық серуенге шығуға және жазу құралдарын пайдалануға рұқсат берілген.

Саркозидің қорғаушылары сот шешіміне келіспейтінін мәлімдеді. Олардың пікірінше, бұл шешім – саясаткер үшін ауыр соққы әрі әділетсіз үкім. Адвокаттар оны Жаңа жылға дейін босату жөнінде өтініш берді. Апелляциялық соттың бұл өтінішті бір ай ішінде қарауы ықтимал.