Асан Джалилов
Мәжіліс денсаулық сақтау саласы қызметкерлеріне күш көрсетуге байланысты жауапкершілікті қатаңдатуды көздейтін заң жобасын бірінші оқылымда мақұлдады. Құжат Қылмыстық кодекс пен Қылмыстық-процестік кодекске енгізілетін бірқатар өзгерістерді қамтиды. Заң жобасы медицина қызметкерлері мен жедел жәрдем жүргізушілеріне қызметтік міндетін атқару кезінде жасалатын кез келген зорлық-зомбылыққа қатаң жауапкершілік белгілеуді көздейді. Бұл бастама Мемлекет басшысының медициналық персоналдың қауіпсіздігін күшейту жөніндегі тапсырмасына сәйкес әзірленген.
Құжатқа сәйкес:
• денсаулыққа қауіп төндірмейтін зорлық-зомбылық қолданғаны үшін немесе қорқытқаны үшін
500–1000 АЕК көлемінде айыппұл,
сондай-ақ түзеу жұмыстары, 600 сағатқа дейін қоғамдық жұмыстар немесе үш жылға дейін бас бостандығын шектеу не айыру жазасы қарастырылған;
• ауырлататын мән-жайлар кезінде жаза 3 жылдан 7 жылға дейін;
• өмірі мен денсаулығына қауіпті зорлық-зомбылық үшін
5 жылдан 10 жылға дейін, ал ауырлататын жағдайларда 7 жылдан 12 жылға дейін бас бостандығынан айыру жазасы белгіленеді.
Сонымен қатар заң жобасы мұндай санаттағы істер бойынша алдын ала тергеу мен анықтауды ішкі істер органдарының жүргізу тәртібімен бекітуді көздейді.
Мәжіліс бұл түзетулердің медициналық қызметкерлердің қауіпсіздігін қамтамасыз етуге және денсаулық сақтау жүйесінде қалыптасқан тәуекелдерді азайтуға бағытталғанын атап өтті.
