Мәулен Әшімбаев: Ең төменгі жалақы азаматтың нақты қажеттіліктерін ескеруі тиіс

Астана. 9 қазан 2025 жыл. Barbang Info – Қазақстан Республикасы Парламенті Сенатының Төрағасы Мәулен Әшімбаев ең төменгі жалақы мөлшері елдегі макроэкономикалық көрсеткіштерге ғана емес, азаматтардың өмірлік қажеттіліктері мен әлеуметтік стандарттарына негізделуі қажет екенін айтты. «Ең төменгі жалақыны белгілеу кезінде тек құрғақ макроэкономикалық деректерге сүйену жеткіліксіз. Біз адамның нақты қажеттіліктерін, оның өмір сүру деңгейін ескеруіміз керек. Ең төменгі жалақы дәл осы ұстаным негізінде айқындалуға тиіс. Конвенцияның мәні де – осы», – деді Әшімбаев Сенаттың кезекті отырысында сөйлеген сөзінде. Жиын барысында сенаторлар ең төменгі жалақыны белгілеу туралы халықаралық Конвенцияны ратификациялады. Құжатта ең төменгі еңбекақыны қызметкерлер мен олардың отбасыларының әлеуметтік қажеттіліктерін, сондай-ақ елдің экономикалық даму деңгейін ескере отырып айқындау қарастырылған. Конвенцияның негізгі ережелеріне сәйкес, ең төменгі жалақы міндетті сипатқа ие болады және оны төмендетуге жол берілмейді. Сонымен қатар, мемлекеттерге жалақыны кезең-кезеңімен қайта қарау тетіктерін бекіту ұсынылады. Бұл үдеріс барысында жұмыс берушілер мен қызметкерлердің өкілдері қатысатын консультациялар өткізілуі тиіс.