Асан Джалилов
Иран президенті Масуд Пезешкиан елдің астанасын Тегераннан көшіру мәселесінің күн тәртібіне қайта шыққанын жариялады. Оның айтуынша, қазіргі жағдайды ескерсек, бұл қадам ерікті емес, мәжбүрлі шешімге айналып отыр.
Президент бұған дейін мұндай бастамаға ел бюджетіндегі шектеулер мүмкіндік бермегенін, бірақ бүгінгі ахуал астананы көшіруді кейінге қалдыруға жол бермейтінін айтты.
Иранда соңғы жылдары экологиялық жағдай күрт нашарлаған. Ел аумағындағы жауын-шашын мөлшері айтарлықтай азайып, биылғы күз бірнеше онжылдықтағы ең құрғақ кезеңдердің біріне айналған. Су тапшылығы, ауа ластануы және жердің төмендеуі Тегеранды өмір сүруге қолайсыз қалаға айналдырып барады.
Пезешкиан астананы елдің оңтүстік бөлігіне жақын аймаққа көшіру қажет екенін бұрын да айтқан. Оның сөзінше, қазіргі климаттық және инфрақұрылымдық жағдайлар бұл мәселені кейінге қалдыруға болмайтынын көрсетіп отыр.
Тегерандағы су тапшылығының күшеюіне байланысты тұрғындарды эвакуациялау мәселесі де қарастырылуда. Астананы көшіру жөніндегі бастама Иранда бұған дейін бірнеше рет көтерілгенімен, түрлі себептермен жүзеге аспай келген.
