Бакыт Кулманов
Ұлттық компаниялар – ел экономикасының тірегі ғана емес, бюджет тұрақтылығының да негізі. Бұл туралы Мәжілістің жалпы отырысында Премьер-министр Олжас Бектенов мәлімдеді.
Оның айтуынша, 2024 жылдан бастап күшіне енген жаңа Бюджет кодексінде ұлттық компаниялардан мемлекеттік бюджетке төленетін дивидендтің ең төменгі мөлшері 50–70% көлемінде белгіленді. Бұрын мұндай нақты нормалар болмаған. Енді бұл шектік мөлшер Үкімет қаулысымен бекітіліп, заңдық негізде жүзеге асады.
Премьер-министрдің сөзінше, бұл қадам ашықтықты арттырып, ұлттық компаниялардың қаржы айналымын Парламент тарапынан бақылауға мүмкіндік береді. Сонымен қатар, Үкімет өкілдері әрбір ұлттық компанияның иелігінде қалатын қаражаттың да заңға сәйкес, ашық тендерлер мен сатып алу рәсімдері арқылы жұмсалатынын атап өтті.
Назар аударарлық дерек – «Самұрық-Қазына» қоры қазіргі таңда 53 триллион теңгеге бағаланған ауқымды инвестициялық бағдарламаны іске асырып жатыр. Бұл – Қазақстан тарихындағы ең ірі қаржылық жобалардың бірі. Қор тек экономикалық емес, әлеуметтік бағыттағы істерге де белсенді араласуда.
Мәселен:
- 550 миллиард теңге еліміздің түрлі өңірлеріндегі денсаулық сақтау нысандарына бағытталса,
- 272 миллиард теңге – жалға берілетін тұрғын үйлер салуға бөлінген.
Осылайша, қордың дивидендтері мен қалған қаражаттары бір мезетте әрі бюджетті толықтыруға, әрі халық игілігіне жұмсалатын жобаларды қаржыландыруға бағытталып отыр.
Олжас Бектенов бұл механизмді мемлекет үшін тиімді «қос арналы инвестициялық модель» ретінде сипаттап, ұлттық компаниялар мен бюджеттің арасында теңгерімді тетік орнағанын айтты.
