Асан Джалилов
Алматы қаласындағы №95 мектеп-лицейде химия пәнінен сабақ беретін Татьяна Белоусова Global Teacher Prize 2025–2026 халықаралық байқауының қорытындысы бойынша әлемнің ең үздік 50 педагогінің қатарына енді. Бұл нәтиже қазақстандық білім беру саласының халықаралық деңгейде мойындалып келе жатқанын көрсетеді.
Татьяна Белоусова – педагог-шебер, сондай-ақ «Қазақстанның үздік ұстазы – 2024» құрметті атағының иегері. Халықаралық байқауға қатысу барысында оның кәсіби жолы мен педагогикалық тәжірибесі бірнеше кезең бойынша бағаланған. Үміткерлер сауалнама толтыру және қосымша материалдар ұсыну арқылы бастапқы іріктеуден өтсе, одан кейін олардың жұмысы сараптамалық тұрғыдан талданып, финалдық кезеңде үздіктер анықталған.
Әлемнің үздік 50 мұғалімінің ресми тізімі 2025 жылғы 15 желтоқсанда Global Teacher Prize байқауының ресми сайтында жарияланды. Ал осы тізімге енген финалистерді марапаттау рәсімі 2026 жылғы 1–5 ақпан аралығында Дубай қаласында өтетін халықаралық білім беру форумы аясында ұйымдастырылады.
Қазақстан бұл беделді байқауға бесінші рет қатысып отыр. Осы уақытқа дейін, биылғы нәтижені қоса алғанда, ел өкілдері үш мәрте әлемнің үздік елу педагогінің қатарына енген. Бұл көрсеткіш қазақстандық мұғалімдердің кәсіби деңгейі мен еңбегінің халықаралық қауымдастық тарапынан жоғары бағаланып отырғанын аңғартады.
