Асан Джалилов
2026 жылғы 1 ақпандағы дерек бойынша Қазақстанда тіркелген заңды тұлғалар саны 550 204-ке жетті. Оның ішінде 438 787-сі белсенді жұмыс істеп тұрған субъектілер. Бұл туралы Ұлттық статистика бюросы мәлімдеді.
Статистикалық мәліметтерге сәйкес, 2026 жылғы қаңтарда заңды тұлғалар саны 2025 жылғы желтоқсанмен салыстырғанда 0,1 пайызға артқан. Ал өткен жылдың осы кезеңімен салыстырғанда өсім 2,5 пайызды құрады. Жалпы алғанда, 2016 жылдан 2025 жылға дейін заңды тұлғалар саны 383 850-ден 549 669-ға дейін көбейіп, 43,2 пайызға ұлғайған.
Тіркелген компаниялардың басым бөлігі сауда және қызмет көрсету саласында шоғырланған. Атап айтқанда, «көтерме және бөлшек сауда, автомобильдер мен мотоциклдерді жөндеу» бағыты жалпы құрылымның 26,7 пайызын құрайды. Құрылыс саласының үлесі 13,4 пайыз болса, өзге қызмет түрлерін көрсету саласы 9,9 пайызға жеткен.
Аймақтық бөліністе заңды тұлғалардың ең көп тіркелген өңірлері ретінде Алматы қаласы (28,8%), Астана қаласы (19,5%) және Шымкент қаласы (5,5%) көш бастап тұр.
