Бакыт Кулманов
Қазақстан Сенаты жаңартылатын энергия көздері саласындағы жобаларды дамыту туралы Қытаймен жасалған келісімді ратификациялады. Құжат «жасыл» технологиялар, электр энергиясын өндіру және сақтау бағытындағы бірлескен жобаларды жүзеге асыруды көздейді.
Жоба аясында жалпы қуаты 1,8 ГВт болатын үш ірі нысан салу жоспарланған. Оның ішінде екі жел электр станциясы (1,5 ГВт) және бір күн электр станциясы (300 МВт) бар. Нысандар 2027–2029 жылдары Қарағанды, Түркістан және Павлодар облыстарында іске асырылмақ.
Сенатор Ольга Булавкинаның айтуынша, жобалар күн және жел ресурстары жоғары өңірлерде орналасады және Бірыңғай электр энергетикалық жүйеге интеграцияланады. Қазақстан тарапынан тең инвестор ретінде Самұрық-Энерго акционерлік қоғамы қатысады.
Жобаларға 2 млрд доллардан астам инвестиция тарту көзделіп отыр. Сонымен қатар 200-ден астам тұрақты және 2000 уақытша жұмыс орны ашылады деп жоспарланған.
