barbang info
2025 жылдың үшінші тоқсанында Қазақстанда ипотекалық несиеге деген сұраныс төмендеп, автонесиелеуге қызығушылық жоғарылады. Бұл жөнінде Ұлттық банк таратқан ақпаратта айтылды.
Хабарламада банктер ипотека бойынша сұраныстың азайғанын, ал автокредитке түскен өтінімдер деңгейінің жоғары сақталғанын көрсеткен. Сонымен бірге кепілмен және кепілсіз берілетін тұтынушылық несиелерге сұраныс өткен тоқсанмен шамалас болған.
Ипотекаға деген қызығушылықтың азаюына жылдық тиімді сыйақы мөлшерлемесінің 25%-дан 20%-ға дейін төмендетілетіні туралы ақпарат әсер еткен. Осыған байланысты кей банктер өз талаптарын қайта қарап шыққан. Соған қарамастан, ипотекалық өтінімдер саны 19%-ға өсіп, 288 мыңға жеткен. Орташа өтінім көлемі де 21%-ға артып, 21 млн теңгені құраған.
Кепілмен берілетін тұтынушылық несие бойынша өтінімдер саны 94%-ға өсіп, 94 мыңға дейін көбейген. Мұндай серпін банктердің жаңа цифрлық сервистерді іске қосуымен және өтінім беру процесінің жеңілдеуімен байланысты. Алайда орташа өтінім көлемі 21%-ға төмендеп, 12 млн теңгеге түскен.
Кепілсіз тұтынушылық несиелерге сұраныс өзгеріссіз қалғанымен, өтінімдер саны 6%-ға төмендеп, 17,2 млн болған. Бұл сегменттегі өзгерістер несие мерзімінің 5 жылға дейін қысқаруы, 21 жасқа толмаған және 55 жастан асқан азаматтарға қойылатын қосымша талаптар, «суыту кезеңі», сондай-ақ несие тарихы жоқ адамдардың банк бөлімшесіне келу қажеттілігімен байланысты. Орташа өтінім көлемі 7%-ға өсіп, 1,05 млн теңгеге жеткен.
Автонесиеге деген сұраныс бірінші жартыжылдықта іске қосылған автосалондарды қолдау бағдарламаларының жалғасуына байланысты жоғары деңгейде қалды. Өтінімдер саны бұрынғы деңгейде – 1,52 млн көлемінде сақталған. Ал орташа көлемі 5%-ға азайып, 6,9 млн теңгені құрады.
Банктердің мәліметінше, мақұлданған өтінімдер үлесі төмендеген:
• ипотекалық несиелер – 23%,
• кепілмен берілетін тұтынушылық несиелер – 22%,
• автонесиелер – 17%.
Кепілсіз несиелер бойынша көрсеткіш өзгеріссіз қалып, 32% деңгейінде сақталған.
Банктер 2025 жылдың төртінші тоқсанында ипотекаға, кепілсіз тұтынушылық несиеге және автонесиеге сұраныс біршама төмендеуі мүмкін екенін болжауда. Ал кепілмен берілетін несиелерге деген сұраныс деңгейі өзгеріссіз қалады деп күтіледі.
Бұл сауалнамаға екінші деңгейлі 21 банк қатысқан. Ол несиеге сұраныс пен ұсыныстағы тоқсан сайынғы өзгерістерді бақылау мақсатында жүргізіледі.
