barbang info
2025 жылдың басынан бері Қазақстанда көпбалалы отбасылар мен наградталған аналарға арналған мемлекеттік жәрдемақыларды алушылар саны артып, әлеуметтік қолдаудың жалпы көлемі жарты триллион теңгеден асты. Еңбек және халықты әлеуметтік қорғау министрлігінің мәліметінше, 10 ай ішінде 846,5 мың адамға жалпы сомасы 501,8 млрд теңге төленген.
Ресми ақпаратқа сәйкес, осы кезеңде:
- 603 мың көпбалалы отбасы – 436,5 млрд теңге алды;
- 243,4 мың наградталған ана – 65,2 млрд теңгемен қамтылды.
Министрліктің мәліметінше, тек 2025 жылғы қазан айының өзінде мемлекеттік төлемдер көлемі 52 млрд теңгені құраған. Оның ішінде:
- көпбалалы отбасы ретінде тіркелген 590 мың адам – 45,4 млрд теңге,
- ал наградталған 245,1 мың ана – 6,6 млрд теңге көлемінде жәрдемақы алған.
Көпбалалы отбасыларға арналған мемлекеттік жәрдемақы табысқа қарамастан, төрт және одан көп бірге тұратын кәмелетке толмаған балалары бар немесе 23 жасқа дейінгі күндізгі бөлімде оқитын студент балалар тәрбиелеп отырған отбасыларға тағайындалады. Бұл қолдау әлеуметтік әл-ауқатты нығайтып, балалардың өсіп-өніп, білім алуына жағдай жасауға бағытталған.
