Асан Джалилов
Астана. 21 қазан 2025 жыл. Barbang Info – Қазақстан Президенті Қасым-Жомарт Тоқаев пен Әзербайжан Президенті Ильхам Әлиев екіжақты келіссөздер мен Қазақстан–Әзербайжан Жоғары мемлекетаралық кеңесінің отырысы қорытындысы бойынша бұқаралық ақпарат құралдарына арналған бірлескен брифинг өткізді.
Мемлекет басшысы Әзербайжан Президентіне шақыруын қабыл алып, Астанаға мемлекеттік сапармен келгені үшін алғыс білдіріп, бұл сапардың ерекше маңызға ие екенін атап өтті. Президент Тоқаев екі елдің тарихи және рухани жақындығына тоқталып, Қазақстан мен Әзербайжанның стратегиялық серіктестігі мен өзара сенімді қарым-қатынасы тұрақты дамып келе жатқанын айтты.
Сондай-ақ Мемлекет басшысы Әзербайжан Президенті Ильхам Әлиевтің ел тәуелсіздігін нығайтудағы және халықаралық аренадағы беделін арттырудағы еңбегіне жоғары баға берді.
Брифинг барысында Қасым-Жомарт Тоқаев екі ел арасындағы стратегиялық серіктестік туралы шарттың 20 жылдығымен тұспа-тұс келген бұл сапардың символдық мәні бар екенін атап өтті. Оның айтуынша, жоғары деңгейдегі саяси диалог пен үкіметтердің жүйелі жұмысы арқасында қазақ-әзербайжан ынтымақтастығы жаңа мазмұнмен толығып, қарқынды дамып келеді.
Президенттер сауда-экономикалық байланыстарды кеңейтуге, екіжақты тауар айналымын арттыруға және өнеркәсіп, ауыл шаруашылығы, энергетика, цифрландыру салаларындағы ынтымақтастықты тереңдетуге уағдаласты. Келіссөздерде Транскаспий халықаралық көлік дәлізі, Баку–Тбилиси–Жейхан мұнай бағдары, сондай-ақ Каспий теңізі арқылы талшықты-оптикалық байланыс желісін тарту жобасы сияқты стратегиялық бағыттар қарастырылды. Сонымен қатар, тараптар мәдени-гуманитарлық байланыстарды дамытуға, жастар мен ғылыми ұйымдар арасындағы серіктестікті нығайтуға, мәдениет күндері мен кино апталықтарын өткізуге келісті.
Қасым-Жомарт Тоқаев өз сөзінде екі ел арасындағы қарым-қатынастардың дамуы бауырлас халықтардың мүддесіне сай келетінін және стратегиялық серіктестікті жаңа деңгейге көтеруге мүмкіндік беретінін атап өтті. Өз кезегінде Ильхам Әлиев халықтар арасындағы достық пен бауырластық қатынастарды мемлекетаралық ынтымақтастықтың берік іргетасы деп атады. Ол соңғы жылдары жүргізілген өзара сапарлар мен кездесулердің нәтижелі болғанын және қабылданған шешімдердің екі ел игілігіне қызмет етіп жатқанын атап өтті.
