barbang info
Қазақстан Республикасының Сыртқы істер министрлігі БҰҰ Қауіпсіздік Кеңесі қабылдаған 2803 (2025) қарарын қолдайтынын мәлімдеді. Аталған құжат Газадағы қарулы қақтығысты тоқтатуға бағытталған кешенді жоспарды қамтиды.
Министрлік өз мәлімдемесінде бұл қарардың қабылдануын Таяу Шығыстағы күрделі жағдайды тұрақтандыруға жасалған маңызды қадам ретінде бағалап, оны қабылдауға ықпал еткен мемлекеттердің, соның ішінде Америка Құрама Штаттары мен Президент Дональд Трамптың дипломатиялық күш-жігерін атап өтті.
СІМ-нің түсіндіруінше, қарар Газа секторындағы гуманитарлық дағдарысты жеңілдетуге, тараптар арасындағы сенім шараларын қалпына келтіруге және ұзақ мерзімді бейбіт процестің басталуына жол ашуға мүмкіндік береді.
Қазақстан сыртқы саясатының ұстанымы бұрынғысынша өзгеріссіз: еліміз БҰҰ Жарғысының қағидаларын, халықаралық гуманитарлық құқық нормаларын және «екі халық – екі мемлекет» формуласына негізделген Палестина мәселесінің бейбіт әрі тұрақты шешімін қолдайды. Министрлік Палестина мемлекетінің тәуелсіздігі мен аумақтық тұтастығы қамтамасыз етілуі тиіс екенін атап өтті.
Сонымен бірге, Қазақстан Ибраһим келісімдері аясында халықаралық серіктестермен сындарлы ынтымақтастықты жалғастыруға дайын екенін хабарлады. Ел гуманитарлық көмекті кеңейтуге, өңірдегі ахуалды тұрақтандыруға және саяси диалогқа қолайлы жағдай жасауға бағытталған халықаралық бастамаларға өз үлесін қоса беретіні айтылды.
