Қасым-Жомарт Тоқаевқа әлем елдерінің басшыларынан құттықтаулар келіп түсті

Астана. 2025 жылғы 25 қазан. Barbang Info – Қазақстан Президенті Қасым-Жомарт Тоқаевтың атына ұлттық мереке – Республика күніне орай әлем елдерінің басшыларынан және халықаралық ұйымдардың жетекшілерінен құттықтау жеделхаттары келіп түсті. Ресей Президенті Владимир Путин өз жеделхатында Қазақстанның әлеуметтік-экономикалық даму жолындағы табыстарын атап өтіп, екі ел арасындағы жоғары деңгейдегі серіктестікті ерекше бағалады.
Қытай Халық Республикасының Төрағасы Си Цзиньпин Қазақстанның тұрақты дамып келе жатқанын айтып, «Бір белдеу, бір жол» бастамасы аясындағы ынтымақтастықты тереңдетуге дайын екенін білдірді. Америка Құрама Штаттарының Президенті Дональд Трамп Қазақстан мен АҚШ арасындағы экономикалық және қауіпсіздік саласындағы серіктестікті жоғары бағалап, стратегиялық байланыстарды одан әрі кеңейтуге ниетті екенін жеткізді.
Франция Президенті Эммануэль Макрон екі ел арасындағы серіктестіктің жаңа серпін алғанын айтып, халықаралық құқық пен бейбітшілікті сақтау бағытындағы өзара ынтымақтастықтың маңызын атап өтті. Сонымен қатар Ұлыбритания Королі III Чарльз, Өзбекстан Президенті Шавкат Мирзиёев, Қырғызстан Президенті Садыр Жапаров, Тәжікстан Президенті Эмомали Рахмон, Түрікменстан Президенті Сердар Бердімұхамедов, Түркия Президенті Режеп Тайып Ердоған және Әзербайжан Президенті Ильхам Әлиев те өздерінің жылы лебіздерін жолдады. Мемлекет басшысын құттықтағандар қатарында Еуропа, Азия, Таяу Шығыс және Латын Америкасы елдерінің басшылары, сондай-ақ БҰҰ Бас хатшысы Антониу Гутерриш пен халықаралық ұйымдардың жетекшілері бар. Құттықтау жеделхаттарында Қазақстан халқының бейбітшілік пен бірлік жолындағы жетістіктеріне жоғары баға беріліп, еліміздің өркендеуі мен табысты болашағына ізгі тілектер білдірілді.