Асан Джалилов
2025 жылғы 9 қыркүйекте «Барбанг» Қазақстан күрдтері республикалық қауымдастығының төрағасы Азиз Алиевтің бұйрығымен республикалық «Jiyana Kurd» газетінің бас редакторы қызметіне Асан Джалилов тағайындалды.
1991 жылғы 19 қыркүйекте құрылған бұл басылым «Барбанг» қауымдастығының ресми газеті болып табылады және 30 жылдан астам уақыт бойы Қазақстандағы күрд қауымының қоғамдық-мәдени өмірін жариялап келеді. Басылымның басты міндеті – тіл, дәстүр және тарихи мұраны сақтау ісін ілгерілету.
Асан Джалилов – тарихшы, оқытушы және қоғам қайраткері. 1994 жылғы 9 қыркүйекте Шымкент қаласында дүниеге келген. 2012 жылы М. Улугбек атындағы №3 орта мектепті бітіріп, Оңтүстік Қазақстан мемлекеттік педагогикалық институтының тарих факультетіне түсті. 2016 жылы үздік дипломмен тәмамдап, М. Әуезов атындағы Оңтүстік Қазақстан мемлекеттік университетінің магистратурасында «Тарих» мамандығы бойынша білімін жалғастырды. 2018 жылы магистрлік диссертациясын қорғап, аталған университеттің «Тарих және педагогика» факультетінде оқытушылық қызметін бастады және 2023 жылдың желтоқсанына дейін жұмыс істеді.
2020–2021 жылдары Шымкент қаласындағы «Барбанг» күрд этномәдени орталығын басқарды. 2025 жылдың қыркүйегінен бастап М. Әуезов атындағы Оңтүстік Қазақстан университетінде оқытушылық қызметін жалғастыруда.
Қазіргі уақытта Қожа Ахмет Ясауи атындағы Халықаралық қазақ-түрік университетінің «8D01604 – Тарих» білім беру бағдарламасы бойынша 2-курс докторанты. Ғылыми қызығушылықтары Қазақстан мен посткеңестік кеңістіктегі ұлттық саясат, депортация тарихы және этносаяси үдерістерді қамтиды. Республикалық және халықаралық ғылыми журналдарда 60-тан астам ғылыми жарияланым авторы. 2025 жылғы 18 сәуірден бастап «Байтақ» жасылдар партиясының мүшесі.
Жаңа бас редактордың басшылығымен «Jiyana Kurd» газеті медиа кеңістіктегі қамтуын кеңейтуді, электрондық форматтарды дамыту мен талдамалық-ағартушылық бағытты күшейтуді, сондай-ақ жас авторлар мен зерттеушілерді қолдауды жоспарлап отыр.
